Translaziuns interculturalas megliereschan la communicaziun tranter persunas da lingua estra e da persunas dal fatg en scolas, en ospitals e tar las autoritads. A partir dal 2012 porscha il servetsch da translaziuns VERDI quest servetsch da nov sur ils cunfins chantunals. Il di da la ONU per migrantas e per migrants vuless il post chantunal spezialisà per l'integraziun render attent ch'i dovra – ultra da la responsabladad persunala da las migrantas e dals migrants d'emprender la lingua – purschidas confurmas als basegns sco il servetsch da translaziuns.

Actualmain emprendan var 1000 persunas ina da las trais linguas chantunalas en curs che vegnan subvenziunads dal chantun Grischun. La voluntad d'emprender la lingua e da garantir uschia in barat ed ina communicaziun è avant maun tar la maioritad da las persunas estras. Tge èsi però da far, sch'in discurs difficil cun ils geniturs sto vegnir manà curt suenter ch'els èn immigrads en Svizra? Tge far, sch'ina persuna che sto laschar far in'operaziun n'enclegia betg il discurs da preparaziun cumplex? L'immigraziun ha midà la societad ils ultims onns er en il chantun Grischun. I vala dad acceptar questa nova situaziun: en il mintgadi, en scola, en l'ospital u tar il post per intermediaziun da lavur.
Per che quai saja pli facil, remplazza a partir dal 1. da schaner 2012 il servetsch da translaziuns VERDI il post d'intermediar interpretas ed interprets da la Caritas dal Grischun. Per incumbensa dals chantuns Grischun, Son Gagl, Turgovia ed Appenzell Dador intermediescha VERDI sur ils cunfins dals chantuns or ils servetschs da translaturas e da translaturs interculturals. Questa collavuraziun ha plirs avantatgs: ella po garantir a la clientella ina purschida da translaziuns finanziabla, ina meglra cuntanschibladad e translaziuns interculturalas en – da nov – passa 70 linguas.

Da chasa en dus munds
Dals servetschs da VERDI profiteschan en emprima lingia posts statals ed instituziuns dal maun public dals secturs da la sanadad, da la furmaziun e dals fatgs socials. Ma er autras instituziuns e persunas privatas pon, en cas da basegn, profitar da las persunas dal fatg che vegnan intermediadas da VERDI.
Translaturas e translaturs interculturals èn persunas ch'èn scoladas spezialmain per questa incumbensa specifica. Ellas ed els construeschan punts, perquai ch'ellas ed els enconuschan tant il sistem dal pajais d'origin sco er quel da la Svizra. Quai als permetta da declerar – sco supplement da la translaziun – la moda, co ch'ina scola, ina vischnanca u in ospital funcziunescha e da sclerir uschia malchapientschas ch'èn specificas per ina cultura.

Integraziun pretenda communicaziun
La finamira dal di da la ONU per migrantas e per migrants dals 18 da december è quella da render attent a la situaziun speziala da questa gruppa da la populaziun. Sche persunas che sa tiran natiers vulan s'integrar cun success dovra quai lur engaschament precis uschia sco quel da la populaziun indigena e da las instituziuns localas. La confederaziun spetga dals chantuns che persunas estras sco er collavuraturas e collavuraturs da structuras regularas possian profitar d'ina purschida d'intermediaziun d'auta qualitad en il sectur da las translaziuns interculturalas, sch'i sa tracta da manar discurs cumplexs. Cun la collavuraziun interchantunala e cun la professiunalitad da VERDI adempleschan ils chantuns Grischun, Son Gagl, Turgovia ed Appenzell Dador questa pretensiun.
Ulteriuras infurmaziuns survegnan ins en l'internet sut www.integration.gr.ch u www.verdi-ost.ch.


Infurmaziuns:
Patricia Ganter, incumbensada chantunala d'integraziun, telefon 081 257 36 81


Gremi: uffizi da fatgs da polizia e da dretg civil dal Grischun, post spezialisà per l'integraziun
Funtauna: rg uffizi da fatgs da polizia e da dretg civil dal Grischun, post spezialisà per l’integraziun