Ils ospitals dal Grischun e las assicuranzas da malsauns pon realisar la nova finanziaziun dals ospitals che vala dapi il 1. da schaner 2012. La regenza ha fixà superprovisoricamain las pauschalas pro cas necessarias, uschenavant ch'ils ospitals e las assicuranzas da malsauns n'èn betg vegnids da s'accordar davart l'autezza da talas. Per in pèr contracts tariffars che han pudì vegnir concludids gira la procedura d'approvaziun.

Dapi il 1. da schaner 2012 vala en tut la Svizra – sin basa da la lescha federala davart l'assicuranza da malsauns (LAMal) – ina finanziaziun dals ospitals ch'è reglada en moda unitara. Tar il nov sistem da pauschalas pro cas SwissDRG (Swiss Diagnosis Related Groups) vegn mintga dimora a l'ospital attribuida ad ina tscherta gruppa da cas a maun da criteris definids ed indemnisada en moda pauschala. Las pauschalas ch'èn vegnidas fixadas dals ospitals e da las assicuranzas da malsauns ston sa referir a la prestaziun e sa basar sin structuras unitaras en tut la Svizra. Las tariffas d'ospital ston s'orientar a l'indemnisaziun da quels ospitals che furneschan la prestaziun assicurada en moda effizienta e favuraivla en la qualitad necessaria.

Perquai che las assicuranzas da malsauns ch'èn represchentadas da tarifsuisse n'han betg pudì sa cunvegnir cun ils ospitals acuts dal Grischun fin il 1. da schaner 2012, ha la regenza fixà superprovisoricamain las pauschalas pro cas per indemnisar las prestaziuns staziunaras. Cun questa soluziun transitorica vegni pussibilità als ospitals acuts da facturar ils tractaments staziunars e garantì ch'els sajan liquids. Las pauschalas pro cas fixadas superprovisoricamain valan fin che la regenza ha fixà provisoricamain las pauschalas pro cas per la durada da la procedura da fixaziun. Davart las pauschalas pro cas provisoricas pon ils partenaris da tariffa prender posiziun fin la fin dal mais.

Inoltrà contracts tariffars cun trais assicuranzas
A la regenza èn vegnids inoltrads per l'approvaziun ils contracts tariffars tranter la federaziun grischuna "chasas ed ospitals" e las assicuranzas da malsauns Helsana, Sanitas e KPT. A quests contracts èn sa participads ils suandants ospitals: ospital chantunal dal Grischun, ospital da Tavau, ospital da l'Engiadin'ota, Samedan, ospital regiunal da la Surselva, Glion, ospital regiunal dal Partenz, Schiers, ospital San Sisto, Puschlav, ospital da la Bregaglia, Promontogno, ospital da la Val Müstair, ospital cirquital dal Surses, Savognin, e la clinica autalpina da Tavau. Durant la procedura d'approvaziun dals contracts tariffars vegnan las prestaziuns d'ospital indemnisadas sin la basa da las pauschalas pro cas fixadas. Betg sa participads als contracts tariffars fixads tranter la federaziun grischuna "chasas ed ospitals" e las assicuranzas da malsauns Helsana, Sanitas e KPT èn ils ospitals da Tusaun e da Scuol sco er la clinica Gut cun sias sedias a San Murezzan ed a Cuira.


Infurmaziuns:
presidenta da la regenza Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun