La regenza ha avert la consultaziun davart l'ordinaziun da finanzas per las vischnancas. L'ordinaziun concretisescha la lescha da finanzas dal chantun Grischun e furma la basa per realisar il model armonisà da contabilitad 2 (MAC2) en las vischnancas. La finamira è da cuntanscher ina meglra transparenza da la situaziun da facultad, da finanzas e da rendita da tut las communitads publicas.

La sessiun d'october 2011 ha il cussegl grond deliberà la lescha da finanzas dal chantun Grischun (LFC). Questa lescha sa basa fermamain sin il MAC2 da la conferenza da las directuras e dals directurs chantunals da finanzas. La lescha da finanzas vala er per las vischnancas politicas, uschenavant ch'i na valan betg disposiziuns chantunalas divergentas u uschenavant che questa lescha na regla betg expressivamain causals chantunals. Suenter ch'il termin da referendum è scadì senza ch'i saja vegnì fatg in tal, duai la lescha da finanzas entrar en vigur il december 2012.

La lescha da finanzas vegn concretisada tras in'ordinaziun da finanzas specifica per las vischnancas (OFV). La regenza ha mess a disposiziun il sboz preliminar per la consultaziun fin mez avrigl 2012. L'uffizi da vischnancas organisescha occurrenzas d'infurmaziun regiunalas per las vischnancas. Questas occurrenzas han lieu il mars 2012.

En l'avegnir quints cumparegliabels
L'introducziun dal MAC2 augmenta la cumparegliabladad dals quints da tut las communitads publicas. Las metodas da rendaquint vegnan plinavant adattadas a quellas da l'economia privata. En differents secturs introducescha il MAC2 novs elements. Tranter auter vegn l'agiunta al quint annual cumplettada cun ina glista da las participaziuns, cun ina glista da las garanzias e cun ina cumprova da l'agen chapital. Plinavant daventi obligatoric da manar in quint da cash flow sco er ina contabilitad da la facultad investida. Novaziuns resultan er, tras ina cumprova dal gudogn e da la perdita sin trais stgalims e tras in nov plan dals contos armonisà, tar la valitaziun da la facultad da finanzas e da la facultad administrativa sco er tar las amortisaziuns. Las vischnancas pon – quai cuntrari al chantun – duvrar vinavant bunas bilantschas per amortisaziuns extraordinarias.

L'administraziun chantunala vegn ad introducir il MAC2 per il 1. da schaner 2013. A partir da l'onn da gestiun 2013 vegnan rimnadas emprimas experientschas cun in pèr vischnancas da model, avant ch'il MAC2 vegn introducì en tut il chantun. Las vischnancas han temp fin l'onn 2018 d'introducir il MAC2. Per las corporaziuns regiunalas e per las corporaziuns da vischnancas sco er per las vischnancas burgaisas vala la lescha da finanzas mo confurm al senn. I vegn desistì da fixar standards minimals. Las vischnancas burgaisas duain dentant render quint autonomamain en l'avegnir.


Remartga:
Ils documents da consultaziun pon vegnir consultads en l'internet sut www.gr.ch (Publicaziuns / Consultaziuns).


Infurmaziuns:
- cussegliera guvernativa Barbara Janom Steiner, scheffa a. i. dal departament da finanzas e vischnancas, tel. 081 257 25 01
- Thomas Kollegger, manader da l'uffizi da vischnancas, tel. 081 257 23 81
- Daniel Wüst, manader da la contabilitad, tel. 081 257 23 83


Gremi: regenza
Funtauna: rg chanzlia chantunala dal Grischun