Il departament d'economia publica e fatgs socials ha manà tras oz a Landquart ina dieta davart l'iniziativa cunter las abitaziuns secundaras ch'il pievel svizzer ha acceptà ils 11 da mars 2012.

La finamira da l'occurrenza en il center da furmaziun e cussegliaziun agricula Plantahof è stada in barat d'infurmaziuns e d'opiniuns davart las eventualas consequenzas da l'iniziativa sco er davart ils problems e davart las dumondas avertas en connex cun la realisaziun dal nov artitgel constituziunal davart la construcziun d'abitaziuns secundaras. Las var 80 participantas e participants eran represchentantas e represchentants da partidas politicas, da federaziuns e d'organisaziuns sco er da vischnancas e da regiuns pertutgadas.

En ina emprima part han las represchentantas ed ils represchentants dal chantun infurmà davart il stadi da las lavurs da realisaziun en las differentas gruppas da lavur dal chantun, da la conferenza da las regenzas dals chantuns alpins (CRCA) e da la confederaziun sco er davart ils giavischs principals che las represchentantas ed ils represchentants chantunals represchentan en questas gruppas da lavur. En la segunda part han las participantas ed ils participants pudì exprimer lur atgnas ponderaziuns, enconuschientschas e resalvas ch'èn vegnidas rimnadas sco inputs supplementars per mauns da las gruppas da lavur.

Sco quai ch'il cusseglier guvernativ Hansjörg Trachsel ha infurmà a la dieta stattan per il chantun ils suandants giavischs principals en il center da la realisaziun da l'iniziativa:

• Fin la fin da l'onn 2012 duain abitaziuns secundaras anc pudair vegnir permessas tenor il dretg vertent, cunquai che l'iniziativa declera explicitamain mo quellas permissiuns da construcziun sco nunvalaivlas che vegnan concedidas a partir dal 1. da schaner 2013. La medema posiziun han er auters chantuns pertutgads sco er numerus professers da dretg. 
• Abitaziuns tenor il dretg vegl, q.v.d. abitaziuns existentas ch'èn vegnidas permessas tenor il dretg vegl senza cundiziuns areguard l'utilisaziun e senza ina disposiziun sco emprima abitaziun u sco abitaziun secundara, duain – pervia da la garanzia dal possess actual – pudair vegnir duvradas vinavant libramain. Ellas duain pia dastgar vegnir vendidas u dadas en locaziun tant sco emprimas abitaziuns sco er sco abitaziuns secundaras. Cas cuntrari subissan las emprimas abitaziuns existentas ch'èn savens en la proprietad da persunas indigenas perditas massivas da la valur. Da quai patiss tranter auter er il mantegniment da la substanza. Il stop d'abitaziuns secundaras duai – en correspundenza cun la finamira primara da l'iniziativa – valair cun auters pleds mo per la construcziun da abitaziuns secundaras novas. 
• La noziun "abitaziun secundara" duai vegnir definida uschia ch'i resta pussaivel en l'avegnir da construir abitaziuns da vacanzas che vegnan dadas en locaziun resp. ch'èn occupadas bain. 
• Las consequenzas negativas da l'iniziativa per l'hotellaria ston vegnir mitigiadas da la confederaziun cun mesiras accumpagnantas correspundentas.

A la dieta han pudì vegnir fatgas duas enconuschientschas principalas: Per l'ina èsi vegnì constatà ch'i dat anc bleras dumondas avertas e che la dimensiun precisa da las consequenzas per ils chantuns pertutgads n'è perquai anc betg giuditgabla. Per l'autra han ins vesì che la regenza s'engascha cun tutta forza per soluziuns che tegnan quint uschè bain sco pussaivel dals interess da la populaziun e da l'economia publica dal Grischun.


Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Remartga:
La posiziun dal chantun areguard las abitaziuns secundaras po dal rest vegnir consultada sut www.are.gr.ch.


Gremi: departament d'economia publica e fatgs socials
Funtauna: rg departament d'economia publica e fatgs socials