La cumissiun per sanadad e fatgs socials propona al cussegl grond d'acceptar la missiva da la regenza tar la revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas).

La cumissiun per sanadad e fatgs socials ha predeliberà la revisiun parziala da la lescha per promover la tgira da persunas malsaunas (legislaziun executiva tar la planisaziun dals ospitals) per la sessiun d'avust 2012 dal cussegl grond. La sesida ha durà in entir di ed è vegnida presidiada da la deputada e presidenta da la cumissiun Gabriela Tomaschett-Berther. A la sesida han prendì part er il cusseglier guvernativ Christian Rathgeb ed ina represchentanza dal departament da giustia, segirezza e sanadad.

La planisaziun grischuna dals ospitals vegn fixada da nov sin il stgalim da la lescha, e quai tenor las prescripziuns federalas orientadas a la prestaziun. Il sboz tar la revisiun parziala da la lescha per promover la tgira da persunas malsaunas cuntegna pia in nov chapitel davart la planisaziun dals ospitals e davart la glista dals ospitals. Ultra dals criteris da la rentabilitad e da la qualitad fa il sboz da lescha er autras pretensiuns als ospitals. L'adempliment da questas pretensiuns è la cundiziun per obtegnair ina cunvegna da prestaziun. Questas pretensiuns han provocà discussiuns cuntraversas en la cumissiun ed han chaschunà la finala numerusas propostas da minoritad. Dal puntg da vista material è en spezial la proposta da minoritad impurtanta che pretenda che las pretensiuns per conceder incaricas da prestaziun vegnian cumplettadas cun l'obligaziun d'in contract collectiv da lavur e che quai vegnia fixà en la lescha. Il sboz da la lescha prevesa las cundiziuns da lavur usitadas en la branscha. Quai è memia pauc per la minoritad menziunada. Ultra da quai è vegnida fatga mo pli ina proposta da minoritad che vul permetter als ospitals – entaifer l'incarica da prestaziun – da furnir prestaziuns medicinalas er ordaifer l'ospital. Dal rest è la cumissiun suandada la missiva ch'è vegnida recepida en moda positiva er da la federaziun grischuna "chasas ed ospitals".

La cumissiun per sanadad e fatgs socials propona al cussegl grond d'entrar en il project e d'acceptar la revisiun parziala da la lescha per promover la tgira da persunas malsaunas.


Infurmaziuns:
presidenta da la cumissiun Gabriela Tomaschett-Berther, tel. 081 920 22 22


Gremi: cumissiun per sanadad e fatgs socials
Funtauna: rg cumissiun per sanadad e fatgs socials