La regenza ha deliberà la missiva concernent la fusiun da las vischnancas dal Scanvetg Arosa, Calfreisen, Castiel, Langwies, Lüen, Molinis, Peist e St. Peter-Pagig a la nova vischnanca dad Arosa. Questa fusiun duai vegnir realisada per il 1. da schaner 2013.
 
Las votantas ed ils votants da las otg vischnancas dal Scanvetg Arosa, Calfreisen, Castiel, Langwies, Lüen, Molinis, Peist e St. Peter-Pagig han acceptà ils 17 da zercladur 2012 ina fusiun cun ina quota da vuschs affirmativas da var 65 pertschient. Silsuenter è il contract da fusiun vegnì approvà da la regenza grischuna. En la proxima sessiun da december vegn il cussegl grond a tractar questa fusiun da vischnancas. La fusiun duai entrar en vigur da Bumaun.

Il Scanvetg enconuscha ina collavuraziun intercommunala fitg intensiva. Per ademplir incumbensas communalas, ma er en ils secturs da la cultura, dal sport e dals fatgs socials datti gia dapi blers onns numerusas e stretgas colliaziuns tranter las vischnancas. E quai schebain che la direcziun economica da las otg vischnancas da vallada che fusiuneschan è per part pulit differenta.

Uschia lavuran ad Arosa quatter tschintgavels da las emploiadas e dals emploiads en il sectur da servetschs, a Calfreisen percunter trais quarts en l'agricultura ed en la selvicultura, pia en il sectur primar. Arosa ha in pe da taglia da 90 pertschient ed appartegna a la gruppa da forza finanziala 1 (finanzialmain fitg ferm), Calfreisen percunter in tal da 120 pertschient ed è classifitgada en la gruppa da forza finanziala 5 (finanzialmain fitg debel).

Tenor l'avis da la regenza correspunda la fusiun da vischnancas en moda ideala a la refurma iniziada da las structuras territorialas dal chantun Grischun (refurma da vischnancas e dal territori). Tut en tut vegn la fusiun a la nova vischnanca dad Arosa sustegnida cun ina contribuziun chantunala da promoziun dad 11,3 milliuns francs. Supplementarmain vegnan concedidas prestaziuns spezialas en il senn d'ina garanzia dal possess actual, sco per exempel la classificaziun da la nova vischnanca en la gruppa da forza finanziala 4 (finanzialmain debel).

Cun 15 473 hectaras posseda la nova vischnanca in territori considerabel. L'onn 2010 vivevan stgars 3400 abitantas ed abitants en las otg vischnancas che fusiuneschan ussa. Per l'onn 2013 vegniss il dumber da vischnancas grischunas – pervia d'auters projects da fusiun – a sa reducir da 176 a 158. 


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01
- Simon Theus, vicemanader da l'uffizi da vischnancas, tel. 081 257 23 87


Gremi: regenza
Funtauna: rg chanzlia chantunala dal Grischun