La cumissiun per furmaziun e cultura dal cussegl grond ha predeliberà la missiva da la regenza tar la lescha davart las scolas autas ed ils instituts da perscrutaziun (LSAIP) e propona al cussegl grond d'approvar quest project.

Sut il presidi dal deputà Duri Bezzola ed en preschientscha da cusseglier guvernativ Martin Jäger ha la cumissiun dal cussegl grond per furmaziun e cultura (CFC) predeliberà la missiva tar la lescha davart las scolas autas ed ils instituts da perscrutaziun (LSAIP) durant duas sesidas d'in entir di e deliberà ella per mauns dal cussegl grond.

L'onn 2008 ha il cussegl grond acceptà l'incumbensa da la CFC da stgaffir ina lescha davart las scolas autas ed ils instituts da perscrutaziun ed ha incumbensà la regenza da garantir a lunga vista la posiziun dal Grischun sco lieu da studi e da perscrutaziun e d'augmentar sia attractivitad en chaussa. Cun la missiva qua avant maun ademplescha la regenza questa incumbensa, perquai è la cumissiun entrada unanimamain en quest project.

Er cun il cuntegn dal sboz da lescha preschentà è la cumissiun per gronda part cuntenta. Ils giavischs centrals d'ina basa unitara per las scolas autas ed ils instituts da perscrutaziun existents, dal sustegn da novas iniziativas en il sectur da las scolas autas e da la perscrutaziun sco er la garanzia ch'il Grischun sco lieu da studi e da perscrutaziun survegn er en l'avegnir meds finanzials federals vegnan ademplids. Materialmain fa la cumissiun ina proposta da midada che concerna las contribuziuns ch'il chantun paja a la finanziaziun da basa d'instituts da perscrutaziun d'impurtanza naziunala. Quellas na duain betg – sco proponì en la lescha – importar maximalmain la mesadad dals meds finanzials federals, mabain maximalmain 80 pertschient dals meds finanzials federals. Cun quai vul la cumissiun cuntanscher che instituziuns che genereschan per natira main meds finanzials da terzs possian tuttina survegnir ina finanziaziun adequata. Ina segunda proposta da midada concerna l'incarica da prestaziun ad instituts da perscrutaziun universitars ed ad auters instituts da perscrutaziun. Cun quella na vuless ina maioritad da la cumissiun betg mo autorisar, mabain obligar la regenza da conceder incaricas da prestaziun, sche las ulteriuras premissas legalas èn ademplidas.

La CFC propona al cussegl grond d'approvar il sboz da lescha. Il cussegl grond tracta la lescha davart las scolas autas ed ils instituts da perscrutaziun en la sessiun d'october 2012. 
 

Infurmaziuns:
deputà Duri Bezzola, tel. 079 301 89 08


Gremi: cumissiun per furmaziun e cultura
Funtauna: rg cumissiun per furmaziun e cultura