Dapi 75 onns datti en il chantun Grischun ina controlla da finanzas cun in'atgna basa giuridica sco organ spezial da la surveglianza da las finanzas. Quest giubileum è vegnì festegià ier a Cuira.
La controlla da finanzas è l'organ spezial suprem da la surveglianza da las finanzas e sustegna il cussegl grond resp. sia cumissiun da gestiun (CdG) e la regenza tar lur activitad da surveglianza. Dapi in pèr onns pon profitar er la dretgira chantunala e la dretgira administrativa dals servetschs da la controlla da finanzas. La controlla da finanzas è professiunalmain autonoma ed independenta e suttastat en sia activitad da controlla mo a la constituziun ed a la dretgira. Perquai fixescha ella sezza ses program da controlla, communitgescha quel però a ses incumbensaders. Supplementarmain fixescha la controlla da finanzas mintga onn ina cunvegna da finamiras e da prestaziun cun la CdG e cun la regenza.
La controlla da finanzas ademplescha la funcziun d'in post da revisiun extern e controlla il quint annual chantunal areguard sia regularitad ed areguard sia legalitad. Sco revisiun interna examinescha la controlla da finanzas ils process da finanzas e da gestiun (incl. ristgas ed il sistem da controlla intern) dals posts da servetsch e s'exprima er davart la rentabilitad. Per part vegn la controlla da finanzas er consultada da ses incumbensaders sco cussegliadra. A la controlla da finanzas stattan a disposiziun 13 plazzas. Ils revisurs han tuts in diplom da l'economia da manaschi. Per regla han els er fatg anc ina scolaziun speziala sco experts da contabilitad, sco revisurs interns u sco revisurs d'informatica. Ils revisurs vegnan sustegnids dals assistents da revisiun e dal secretariat.
L'onn 1937 ha la controlla da finanzas cumenzà cun sia activitad sin basa d'ina ordinaziun dal cussegl grond da l'onn 1936. Questa ordinaziun è vegnida revedida cumplessivamain l'onn 1972 e parzialmain l'onn 1996. Ina revisiun cumplessiva è vegnida fatga l'onn 2007. Il medem onn è vegnida relaschada la lescha davart las finanzas e davart la surveglianza da las finanzas sco basa legala. L'onn 2012 è entrada en vigur ina lescha separada davart la surveglianza da las finanzas, uschia che la controlla da finanzas en il chantun Grischun correspunda ussa per gronda part er formalmain a la lescha da model.
Per ses giubileum da 75 onns ha la controlla da finanzas realisà ier saira a Cuira in'occurrenza da giubileum cun giasts. A la tschaina èn sa participads tranter auter la presidenta dal cussegl grond Elita Florin-Caluori, la presidenta da la CdG Tina Gartmann-Albin sco er il president da la dretgira chantunala Norbert Brunner.
Fotografia agiuntada:
controlla da finanzas.jpg
Hansjürg Bollhalder, schef da la controlla da finanzas, po prender encunter ils giavischs da la presidenta dal cussegl grond Elita Florin-Caluori e da la presidenta da la CdG Tina Gartmann-Albin (a dretga) per il giubileum dal post chantunal da revisiun.
Infurmaziuns:
Hansjürg Bollhalder, schef da la controlla da finanzas dal chantun Grischun, tel. 081 257 32 72,
hansjuerg.bollhalder@fiko.gr.ch
Gremi: controlla da finanzas dal chantun Grischun
Funtauna: rg controlla da finanzas dal chantun Grischun