Suenter che la lescha chantunala davart las taxas turisticas è vegnida refusada conceda la regenza grischuna a las vischnancas dapli temp per renunziar a l'obligaziun d'annunziar ils giasts svizzers che han pernottà. 

La soluziun transitorica en connex cun l'obligaziun d'annunziar ils giasts vegn prolungada
Las vischnancas grischunas han per ulteriurs dus onns la pussaivladad d'extender l'obligaziun d'annunziar persunas che pernotteschan er sin Svizras e sin Svizzers. Oriundamain eri previs che tut las interpresas d'alloschament en il Grischun stoppian annunziar a partir da l'onn 2013 mo pli ils giasts da l'exteriur. La disposiziun ch'è entrada en vigur l'onn 2007 e che correspunda al dretg federal dueva distgargiar administrativamain las interpresas pitschnas e mesaunas (IPM) ed era vegnida relaschada quella giada er en vista ad ina nova finanziaziun chantunala dal turissem. Ina regulaziun transitorica dueva permetter a las vischnancas d'abolir l'obligaziun d'annunziar fin la fin da l'onn 2012.
La refusa da la lescha davart las taxas turisticas (LTT) ils 25 da november 2012 tras il suveran grischun ha midà las premissas. Oramai ch'i na vegn betg introducida ina finanziaziun dal turissem, vegnan incassadas en las vischnancas vinavant taxas da cura e taxas per promover il turissem communalas. La basa per abolir l'obligaziun d'annunziar è pia crudada davent per part. Il formular d'annunzia vegn duvrà oz anc sco med auxiliar per registrar e per controllar las datas d'alloschament u per far il rendaquint da las taxas da cura. Ultra da quai ha il formular d'annunzia en tscherts lieus da cura funcziuns supplementaras, sch'i vegn fatg diever da la purschida per giasts.
Las vischnancas che dovran anc il formular d'annunzia sco med auxiliar ston tschertgar ussa in'alternativa. Per ch'ellas hajan temp avunda ha la regenza prolungà il termin per dus onns fin ils 31 da december 2014. Durant quest temp pon las vischnancas mantegnair l'obligaziun d'annunziar er per Svizras e per Svizzers. Ina revisiun parziala correspundenta da las disposiziuns executivas tar la lescha d'ustaria entra en vigur il 1. da schaner 2013. 

La cussegliaziun da la centrala grischuna da dunnas vegn promovida vinavant
La centrala grischuna da dunnas vegn sustegnida vinavant dal chantun per sia lavur da cussegliaziun en connex cun la discriminaziun en la vita professiunala. La regenza ha acceptà da prolungar ina cunvegna da prestaziun correspundenta fin la fin da l'onn 2016 ed ha approvà ina indemnisaziun annuala da 25 000 francs. Resalvada resta l'approvaziun dal credit tras il cussegl grond.
Il post spezialisà per la cussegliaziun en connex cun la lavur e la professiun da la centrala grischuna da dunnas ha manà passa 400 discurs da cussegliaziun durant l'onn 2011. Trais quarts da las cussegliaziuns – per il solit da dunnas – han pertutgà temas en connex cun las relaziuns da lavur (engaschament, salarisaziun, desditga, gravidanza, mobbing e.u.v.). Tenor l'avis da la regenza signifitga la lavur dal post da cussegliaziun ina contribuziun substanziala ed indispensabla a favur da l'egualitad da dunna ed um en il chantun Grischun. Ella cumplettescha raschunaivlamain la lavur da cussegliaziun dal post da stab chantunal per l'egualitad da las schanzas che – pervia da resursas limitadas – n'è betg en il cas da dar cussegliaziuns da questa furma e da questa dimensiun. 

Relaschà ina nova ordinaziun chantunala davart il guaud
Per il 1. da schaner 2013 entra en vigur la lescha chantunala davart il guaud ch'è vegnida revedida totalmain dal cussegl grond durant quest onn. Per quest termin vegn er abolida l'ordinaziun chantunala davart il guaud ch'era vegnida relaschada dal cussegl grond l'onn 1994. Da nov vegnan relaschadas da la regenza disposiziuns executivas tar la lescha. L'ordinaziun chantunala davart il guaud ch'è ussa vegnida approvada da la regenza cuntegna en emprima lingia dretg vertent. Numerusas disposiziuns da l'ordinaziun dal cussegl grond che datescha da l'onn 1994 figureschan ultra da quai da nov en la lescha davart il guaud.  


Da vischnancas e da regiuns 

• Arosa: La nova constituziun da la vischnanca d'Arosa dals 4 da november 2012 vegn approvada (nova vischnanca fusiunada per il 1-1-2013).

Projects da vias
La regenza ha approvà 5,27 milliuns francs per lavurs da construcziun sin ils suandants trajects:
- via dal Güglia / dal Malögia: lavurs d'impressari per il trassé e per la punt en connex cun la correcziun da la via Giustia
- via da Calanca: lavurs d'impressari tar la punt Calancasca ad Arvigo sid, kilometers 6,92 fin 7,10
- via da Val S. Pieder: lavurs d'impressari per la reparatura dals rempars dal torrent en la val da Riein 
 

Gremi: regenza
Funtauna: rg chanzlia chantunala dal Grischun