La regenza dal chantun Grischun ha concludì en sia sesida dals 29 da schaner 2013 da nominar in cumissari da la regenza per la vischnanca da Roveredo. Il motiv è la circumstanza che l'abilitad da decider da la suprastanza communala da Roveredo n'è betg pli dada dapi ils 23 da schaner 2013, perquai ch'il president communal e dus commembers da la suprastanza han demissiunà a partir d'immediat e perquai che la constituziun communala pretenda che almain trais commembers da la suprastanza ston esser preschents per garantir l'abilitad da decider. Ils commembers restants da la suprastanza han dumandà da lur vart la nominaziun d'in cumissari da la regenza. Il cumissari da la regenza ha la cumpetenza da decider. Las mesiras decretadas tenor il dretg da surveglianza duain gidar la vischnanca da Roveredo a surmuntar la crisa instituziunala che dura gia dapi in tschert temp. Sco cumissari da la regenza è vegnì nominà signur dr. Lorenzo Anastasi, advocat ed anteriur president da la dretgira administrativa dal chantun Tessin. Signur Anastasi enconuscha las relaziuns a Roveredo sin fundament d'in anteriur engaschament sco mediatur. La mesira dura fin il mument che la suprastanza communala da Roveredo è puspè cumpletta e pia en cas da prender las decisiuns. Ils custs en chaussa ston vegnir surpigliads da la vischnanca da Roveredo. 
 

Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01
- Thomas Kollegger, manader da l'uffizi da vischnancas, tel. 081 257 23 81


Gremi: regenza
Funtauna: rg chanzlia chantunala dal Grischun