Il chantun Grischun realisescha quest mais scuntradas da giubileum da duas conferenzas da las regenzas: A Tavau sa scuntran las regenzas chantunalas da la Svizra orientala a la 50. conferenza plenara ils 14 da mars, a Scuol e Tarasp sa radunan represchentantas e represchentants al giubileum da 20 onns da la conferenza da las regenzas chantunalas ils 21 e 22 da mars.

Dapi prest in mez tschientaner collavuran ils chantuns da la Svizra orientala Glaruna, Schaffusa, Appenzell Dador, Appenzell Dadens, Son Gagl, Turgovia, Turitg e Grischun en il rom da la conferenza da las regenzas dals chantuns da la Svizra orientala (CRO). La CRO ha tranter auter l'intenziun da permetter in barat d'infurmaziuns cumplessiv, ina represchentaziun efficazia dals interess cuminaivels envers la confederaziun ed auters chantuns sco er ina collavuraziun pli stretga en tscherts champs.

La regenza grischuna è ospitanta da la 50. radunanza plenara da la CRO ed envida la conferenza cun ses president Jakob Stark (cusseglier guvernativ, Turgovia) e las regenzas cumplettas da la Svizra orientala la gievgia, ils 14 da mars 2013, a Tavau. A la sesida da giubileum vegnan tractads tranter auter la participaziun dals chantuns da la Svizra orientala al program Interreg "Rain alpin-Lai da Constanza-Rain aut" sco er il contract internaziunal cun la Germania davart la plazza aviatica da Turitg. 

In'emna pli tard, la gievgia ils 21 ed il venderdi ils 22 da mars 2013 è la conferenza da las regenzas chantunalas (CdC) en visita a Scuol ed a Tarasp. La scuntrada ha lieu 20 onns suenter la fundaziun da la CdC. La gievgia saira stattan sin il program ina visita cun guid en il chastè da Tarasp ed alura ina tschaina communabla a Scuol. Il tema da la radunanza plenara da venderdi è tranter auter la politica d'Europa. La conferenza s'occupa en quest connex cun la dumonda actuala da la relaziun instituziunala da la Svizra envers la UE, cun las tractativas d'electricitad sco er cun il dialog da taglia. Plinavant persequitescha la conferenza las lavurs vi dal pachet da consolidaziun e d'examinaziun da las consolidaziuns e da las incumbensas 2014 da la confederaziun. Ultra da quai han ins l'intenziun da relaschar ina posiziun cuminaivla tar la revisiun da la lescha da consultaziun.

La conferenza dal las regenzas chantunalas è il punct cuminaivel tranter la confederaziun ed ils chantuns en dossiers impurtants da la politica da stadi e da la politica exteriura. Tras la CdC pon las 26 regenzas chantunalas prender influenza sin la politica federala, e quai cun cleras finamiras ed en moda coordinada. L'onn 2008 han retratg la CdC ensemen cun las conferenzas chantunalas da las directuras e dals directurs las pli impurtantas ed ensemen cun autras instituziuns interchantunalas la chasa dals chantuns a Berna. La data da la fundaziun da la CdC, ils 8 d'october, è previs in act festiv uffizial en la chapitala federala.

La regenza grischuna sa legra da beneventar tant la CdC sco er la CRO en in onn da giubileum en il Grischun e giavischa impressiuns durablas sco er dietas cun success. 

Ulteriuras infurmaziuns:
www.gr.ch, www.ork-ostschweiz.ch, www.kdk.ch  


Infurmaziuns:
- president da la regenza Hansjörg Trachsel, schef dal departament d'economia publica e fatgs socials, tel. 081 257 23 01
- cussegliera guvernativa Barbara Janom Steiner, scheffa dal departament da finanzas e vischnancas, commembra da la giunta directiva da la CdC, tel. 081 257 32 01 


Gremi: regenza
Funtauna: rg chanzlia chantunala dal Grischun