Ils edifizis dal chantun duain pudair vegnir duvrads per producir electricitad solara. La regenza grischuna propona da dar liber a terzas persunas surfatschas da tetg adattadas.

Il chantun Grischun pussibilitescha a terzas persunas da duvrar surfatschas da tetg d'edifizis dal chantun per producir electricitad solara. La regenza ha prendì enconuschientscha d'ina valitaziun dal potenzial ed ha decidì da dar liber il diever.
Tenor il studi da l'uffizi d'energia e da traffic vegnan var 50 edifizis dal chantun en dumonda per la producziun d'electricitad tras indrizs fotovoltaics. Tut en tut pudess vegnir messa a disposiziun ina surfatscha da tetg brutta da 17 600 meters quadrat. Igl è vegnì eruì in potenzial annual da producziun d'electricitad da totalmain 1,3 milliuns uras da kilowatt, quai che correspunda circa a l'electricitad che 260 chasadas dovran en in onn. La prestaziun installada da la surfatscha totala da las cellas solaras, che han ina dimensiun da 9700 meters quadrat (surfatscha dals moduls), importass var 1,4 megawatts. 

L'uffizi da construcziun auta dal Grischun fa contracts cun terzas varts interessadas (ovras electricas, persunas privatas e.u.v.) davart l'utilisaziun dals tetgs. Ils contracts fixeschan tranter auter la proprietad ed ils dretgs d'utilisaziun, las relaziuns da planisaziun, d'installaziun e d'utilisaziun, las dumondas da custs e d'indemnisaziun, ma er las cundiziuns da durada e da desditga sco er disposiziuns davart il dretg d'acquist u davart la demontascha dals indrizs.
Tras la valitaziun dal potenzial da la producziun d'electricitad tras indrizs fotovoltaics sin edifizis dal chantun ademplescha la regenza per part ina incumbensa dal cussegl grond (incumbensa Joos concernent l'elavuraziun d'in cataster solar per il Grischun, sessiun d'avust 2012). 
 

Remartga:
Davart quest tema stat a disposiziun in video sut www.gr.ch. 
 

Infurmaziuns:
dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch
 

Gremi: regenza
Funtauna: rg chanzlia chantunala dal Grischun