Tar ina scuntrada cun las instituziuns pertutgadas directamain (vischnanca da Domat, citad da Cuira, uffizi chantunal da construcziun bassa, viafier retica ed uffizi federal per vias naziunalas) ha cusseglier guvernativ dr. Mario Cavigelli infurmà ier al lieu davart il stadi da las lavurs per dumagnar la bova da la Val Parghera. La dimensiun dals eveniments, il stadi da las mesiras immediatas sco er la deponia da la glitta resultanta èn stads en il center da la scuntrada. Suenter è vegnì preschentà il proceder planisà per survegliar la situaziun la proxima stad e per la projectaziun.

Dapi var in mais occupan las bovas da la Val Parghera las persunas pertutgadas e las autoritads. Las mesiras immediatas adempleschan vinavant lur intent. Enfin ussa è adina puspè stà a disposiziun gist avunda temp per prender las proximas decisiuns. La via chantunala tranter Cuira e Domat po vegnir duvrada sur ina punt provisorica dapi ils 4 da matg 2013. Er l'aua ch'era temporarmain maschadada cun glitta, po ussa resp. pudeva puspè vegnir manada tras l'accumulatur da grava e tras il chanal da deflussiun en il Rain. I sto dentant vegnir partì dal fatg che precipitaziuns che duran pli ditg vegnan a chaschunar in'augment da la deflussiun. En quest connex èsi da far quint cun glitta e grava d'approximativamain 20 000 fin 30 000 meters cubic per precipitaziun. La situaziun sto vegnir observada vinavant permanentamain ed il privel n'è anc ditg betg passà. 

Co duai ir vinavant questa stad?
Per ils proxims mais da stad è la finamira d'etablir ina spezia da fasa da gestiun stabila. Per quest intent vegni empruvà da manar la glitta da la Val Parghera, sche pussaivel senza donns en il Rain, resp. d'allontanar la grava pli groppa e da la transportar sin deponias. Igl èn er gia en funcziun differents instruments da mesiraziun che sustegnan las persunas responsablas tar lur decisiuns. Cun quels duai vegnir installà in sistem da surveglianza per percorscher a temp ils eveniments da donn che sa sviluppan. Insatge è cler: I po da tut temp vegnir puspè blera glitta e grava da la Val Parghera. 

Soluziun dal problem a lunga vista
Cun las experientschas fatgas cun ils eveniments, cun las valurs da mesiraziun e cun las observaziuns da mintga di vegn fatg cuntinuadamain in giudicament dal privel cumplessiv. Quel serva sco basa per sviluppar ideas da project per ina soluziun a lunga vista dal problem da la Val Parghera. Sut la direcziun da l'uffizi da guaud e privels da la natira (UGP) ed en stretga collavuraziun cun la partiziun "correcziun dals curs d'aua" da l'uffizi da construcziun bassa (UCB) vegn cumenzà il process da planisaziun e da projectaziun.
Ils 4 da fanadur 2013 èsi previs d'infurmar las medias en preschientscha dals signurs cussegliers guvernativs dr. Mario Cavigelli e dr. Christian Rathgeb davart ils pass planisads e da preschentar emprims resultats. 

Fotografia agiuntada:

Represchentantas e represchentants da tut ils posts involvids durant l'inspecziun da la bova da la Val Parghera gievgia, ils 23 da matg 2013. 
 

Infurmaziuns:
dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  


Gremi: uffizi da guaud e privels da la natira, uffizi da construcziun bassa ed il stab directiv chantunal
Funtauna: rg uffizi da guaud e privels da la natira