Remartga: Questa communicaziun datescha da l' onn 2013 e n' è betg pli actuala. Infurmaziuns actualas chattais Vus qua.

En il rom da la strategia federala d'energia 2050 s'engascha il chantun Grischun particularmain er per in augment da l'effizienza energetica. Il certificat energetic chantunal dals edifizis (CECE) infurmescha las possessuras ed ils possessurs da chasas quant aut che lur basegn d'energia è. Il CECE plus cuntegna ultra da quai in rapport da cussegliaziun che inditgescha mesiras per modernisar ils edifizis. A partir dal 1. da fanadur 2013 promova il chantun cun ina contribuziun chantunala l'emissiun d'in tal certificat.

Il parc d'edifizis dovra circa 45 pertschient da tut l'energia che vegn consumada en Svizra. Co vesa quai ora concretamain en las atgnas quatter paraids, en l'atgna chasa? Dapi l'onn 2009 è il certificat energetic chantunal dals edifizis (CECE) in instrument cumprovà che inditgescha a las possessuras ed als possessurs da chasas quant aut ch'il basegn d'energia da lur edifizi è. Il basegn d'energia vegn mussà cun las classas d'effizienza dad A fin G da la chadaina d'energia enconuschenta. El resguarda il stgaudament, l'aua chauda, l'illuminaziun ed auters apparats che consumeschan electricitad. Il CECE stgaffescha uschia transparenza sin il martgà d'immobiglias e permetta la cumparegliaziun cun auters edifizis.

Propostas cun ina calculaziun dal niz e dals custs
Il CECE plus cuntegna – ultra da la valitaziun da l'edifizi – er propostas levamain chapiblas per mesiras da modernisaziun ed el inditgescha a las proprietarias ed als proprietaris da chasas tge effect resp. tge custs che questas mesiras provocheschan. Ultra d'in giudicament da l'edifizi èsi pussaivel da definir singulas mesiras da renovaziun per mintga sectur da l'edifizi (stgaudament, fanestras, fatschada, tetg e.u.v.). Il CECE plus cuntegna er indicaziuns davart la durada dal niz sco er davart ils custs d'investiziun e da mantegniment. La preschentaziun transparenta dals custs facilitescha las decisiuns d'investiziun. Las proprietarias ed ils proprietaris da chasas che moderniseschan lur edifizi profitan en plirs reguards. Els reduceschan ils custs d'energia, augmentan il confort e la valur da lur edifizi, profitan da programs naziunals da promoziun e gidan a reducir l'emissiun da CO2.
Il CECE plus è in instrument ideal per analisar energeticamain ils edifizis e per proponer mesiras da modernisaziun cunvegnentas. Ils rapports dal CECE vegnan fatgs exclusivamain da spezialistas e spezialists certifitgads. Quai garantescha che las mesiras èn correctas dal puntg da vista professiunal ed èn adattadas per l'object analisà. 

Nov program da promoziun per il CECE plus
A partir dal 1. da fanadur 2013 promova il chantun Grischun cun ina contribuziun chantunala l'emissiun dal CECE plus. Per chasas d'ina famiglia vegnan indemnisads pauschalmain 1000 francs resp. maximalmain 50 pertschient dals custs. Per chasas da pliras famiglias e per edifizis d'administraziun vegnan surpigliads pauschalmain 1500 francs resp. maximalmain 50 pertschient dals custs. Tut las infurmaziuns davart la promoziun ed ils formulars da dumonda, ils mussavias e.u.v. stattan a disposiziun a partir da mez zercladur sin la pagina d'internet da l'uffizi d'energia e da traffic (UEnTr). Las dumondas ston vegnir inoltradas ensemen cun l'offerta d'ina experta u d'in expert dal CECE. Sche a la patruna u al patrun da construcziun vegn empermessa ina promoziun, po vegnir surdada l'incarica a l'experta u a l'expert dal CECE. Il pajament vegn fatg suenter avair tramess al UEnTr ina copia dal rapport da cussegliaziun dal CECE plus ed il quint da l'experta u da l'expert.

Infurmaziuns davart il CECE e davart il CECE plus
Il certificat energetic chantunal dals edifizis vegn emess en l'entira Svizra tenor criteris unitars tras expertas ed experts scolads. Tut las infurmaziuns e la glista da las expertas ed experts certifitgads pudais Vus obtegnair sut www.geak.ch. Infurmaziuns dat er il UEnTr sut il numer da telefon 081 257 36 30.

Scolaziun e furmaziun supplementara per spezialistas e spezialists grischuns
Per ch'i stettian a disposiziun er en il Grischun suffizientamain expertas ed experts dal CECE certifitgads per analisar ils edifizis e per cussegliar las proprietarias ed ils proprietaris da chasas organisescha il UEnTr in curs da furmaziun supplementara per spezialistas e spezialists interessads. Ulteriuras infurmaziuns chattais Vus sin la pagina d'internet dal UEnTr www.aev.gr.ch.

Aperitiv d'energia dals 5 da zercladur 2013
Infurmaziuns pli detagliadas davart il CECE plus e davart il program da promoziun chantunal survegnis Vus mesemna, ils 5 da zercladur, a las 17.00 a chaschun dal 74avel aperitiv d'energia a la scola auta da tecnica ed economia (SATE) a Cuira (program e talun d'annunzia). 


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch  
- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch  
- Andrea Lötscher, manader da la partiziun "effizienza energetica", uffizi d'energia e da traffic, tel. 081 257 36 30, e-mail Andrea.Loetscher@aev.gr.ch  


Gremi: departament da construcziun, traffic e selvicultura
Funtauna: rg departament da construcziun, traffic e selvicultura