La regenza ha classifitgà da nov las vischnancas grischunas per ils onns 2014 e 2015 tenor lur forza finanziala. Sche la refurma da la gulivaziun da finanzas (refurma da la GF) po entrar en vigur l'onn 2015, vala la repartiziun mo pli per l'onn 2014.

Sa basond sin la lescha davart la gulivaziun da finanzas intercommunala (LGF; DG 730.200) reparta la regenza mintga dus onns las vischnancas en las tschintg gruppas da forza finanziala. 
Dapi l'ultima classificaziun da la forza finanziala per ils onns 2012 e 2013 èn vegnidas realisadas quatter fusiuns da vischnancas ed in'ulteriura è planisada per il 1. da schaner 2014. Il dumber da vischnancas sa reducescha pervia da quai da 176 a 146; correspundentamain sa mida er la repartiziun en las singulas gruppas da forza finanziala. Senza resguardar las midadas da classa ch'èn resultadas pervia da las fusiuns menziunadas, midan 23 vischnancas la gruppa da forza finanziala cumpareglià cun la classificaziun vertenta. 
Il motiv per la repartiziun en ina gruppa pli ferma sa chatta tar ils retgavs da taglia ch'èn sa sviluppads en ina moda pli favuraivla envers la media chantunala. Tar las vischnancas che appartegnan da nov ad ina gruppa pli flaivla envers il stadi vertent è il motiv principal per quai il pe da taglia ch'è vegnì augmentà en las vischnancas respectivas durant ils ultims dus onns. Ma en cas singuls han er perditas sproporziunadas dals retgavs da taglia chaschunà ina repartiziun en ina gruppa pli flaivla. Ultra da quai po ina divergenza minimala dals puncts d'index che sa chattan en la limita tranter duas gruppas da forza finanziala chaschunar ina midada da classa. 
Da las vischnancas cun passa 1000 abitantas ed abitants appartegna Claustra-Serneus ad ina gruppa pli ferma e las vischnancas da Mustér, da Domat, da Mesauc e da Zizers arrivan da nov en ina gruppa pli flaivla. 
Durant la sessiun da december 2013 vegn tractada la refurma da la gulivaziun da finanzas (refurma da la GF) che vegn a substituir la legislaziun vertenta davart la gulivaziun da finanzas. Igl è planisà da metter en vigur questa refurma per il 1. da schaner 2015. Cumbinada cun quai è l'aboliziun da la gulivaziun da finanzas indirecta cun la classificaziun da las vischnancas tenor la forza finanziala. Sche la refurma da la GF po entrar en vigur tenor plan l'onn 2015, vala la classificaziun vertenta mo per l'onn 2014. 
 

Agiunta:
Nova classificaziun da las vischnancas en gruppas da forza finanziala tenor la publicaziun en il fegl uffizial dal chantun Grischun dals 15 d'avust 2013


Infurmaziuns:
- Barbara Janom Steiner, scheffa dal departament da finanzas e vischnancas, tel. 081 257 32 01; e-mail: barbara.janom@dfg.gr.ch  
- Thomas Kollegger, manader da l'uffizi da vischnancas, tel. 081 257 23 81, e-mail: thomas.kollegger@afg.gr.ch  
 
 
Gremi: regenza
Funtauna: rg chanzlia chantunala dal Grischun