Il dumber da tschiervs che passenta l'enviern en il Grischun ha cuntanschì la marca da 15 000 animals ed uschia la grondezza anc supportabla. Ils gronds effectivs da selvaschina en il Partenz chaschunan problems per la regiuvinaziun natirala dals guauds da protecziun. Ils selviculturs dal Partenz dattan alarm. A chaschun d'ina inspecziun al lieu han il cusseglier guvernativ Mario Cavigelli e ses collavuraturs orientà dacurt las autoritads communalas en il Partenz davart la problematica.

Ils ultims onns è il dumber da tschiervs s'augmentà cuntinuadamain en il Partenz ed en il Signuradi. La situaziun forestala mussa en spezial da la vart dretga da la val en guauds da protecziun spundivs ch'il svilup natiral è insuffizient. Quai chaschuna gia a vista mesauna ina regiuvinaziun manglusa dal guaud ed ha per consequenza ch'i ston vegnir erigidas charas saivs da protecziun cunter la selvaschina. En las duas regiuns da tschiervs Signuradi-Seewis e Partenz davant vegni perquai prendì en mira – en il rom da la planisaziun da la chatscha – da reducir il dumber da tschiervs. Tras la chatscha duain vegnir evitadas consequenzas negativas per il spazi da viver, ma er per ils animals sezs.

Gronds dumbers da tschiervs pericliteschan la regiuvinaziun natirala dal guaud
En preschientscha dal cusseglier guvernativ Mario Cavigelli han las persunas spezialisadas da l'uffizi da chatscha e pestga sco er da l'uffizi da guaud e privels da la natira explitgà dacurt als represchentants da las vischnancas ils problems e declerà ils connexs. Ditg cun paucs pleds chaschunan ils gronds dumbers da tschiervs in deficit serius da la regiuvinaziun natirala dal guaud en spezial en ils quartiers d'enviern da la vart dretga dal Partenz. Gist en lieus spundivs exponids sur ils abitadis u sur la via naziunala dal Partenz è la situaziun zunt critica.
Ils participants da l'inspecziun al lieu èn stads fitg impressiunads. Tar l'inspecziun da surfatschas da donn daventan tuts conscients che la situaziun sto vegnir meglierada senza retardar. En ils territoris spundivs plain grips è er vegnida illustrada la difficultad d'eriger saivs da protecziun cunter la selvaschina.

La chatscha sto vegnir intensivada a favur da la regiuvinaziun dal guaud
Il connex tranter ils gronds effectivs da tschiervs en ils quartiers d'enviern e la regiuvinaziun natirala dal guaud, ch'è insuffizienta resp. per part manglusa, è stà evident per tut ils participants. Dus terzs dal guaud grischun protegian cunter privels da la natira. L'effect dal guaud da protecziun cunter privels da la natira na dastga betg vegnir reducì, perquai ch'el è var 20 giadas pli favuraivel che ovras da protecziun correspundentas. Sco mesira la pli impurtanta ed efficazia per ina funcziun cuntentaivla dal guaud da protecziun vegni perquai prendì en mira da reducir svelt il dumber da tschiervs. Cumbain ch'ina regiuvinaziun dal guaud da protecziun po vegnir cuntanschida en tscherts lieus mo tras saivs da protecziun cunter la selvaschina, duain talas vegnir erigidas uschè darar sco pussaivel.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail mario.cavigelli@bvfd.gr.ch  
- dr. Georg Brosi, manader da l'uffizi da chatscha e pestga, tel. 081 257 38 91, e-mail georg.brosi@ajf.gr.ch  
- inschigner forestal dipl. SPF Reto Hefti, schef da l'uffizi da guaud e privels da la natira, tel. 081 257 38 51, e-mail reto.hefti@awn.gr.ch  


Gremi: departament da construcziun, traffic e selvicultura
Funtauna: rg departament da construcziun, traffic e selvicultura