La direcziun da la banca naziunala svizra ha visità oz il Grischun. Ad ina scuntrada cun la regenza grischuna a Flem èsi vegnì profità da l'occasiun per barattar infurmaziuns e per tgirar ils contacts.
Igl è in giavisch da la banca naziunala svizra da sa barattar cun las regenzas dals chantuns da la Svizra. Quest onn ha ella fatg viadi en il Grischun. Sin invitaziun da la banca naziunala svizra èn sa scuntrads oz a Flem la direcziun da la banca naziunala e la regenza dal chantun Grischun ad ina discussiun informala. Per la regenza è la scuntrada ina pussaivladad excellenta per tgirar ils contacts e per barattar infurmaziuns preziusas d'emprim maun davart temas che interessan zunt fitg ils chantuns.
Il president da la banca naziunala Thomas Jordan ha orientà davart la situaziun economica generala e davart la politica monetara da la banca naziunala. La regenza grischuna da sia vart ha preschentà la situaziun economica e finanziala sco er las prioritads politicas dal chantun. En ina discussiun animada han pudì vegnir approfundads differents temas actuals. L'occurrenza è stada l'occasiun per dilucidar – or da differents puntgs da vista – perspectivas per noss pajais e per ils chantuns. La regenza engrazia a la direcziun da la banca naziunala svizra per l'invitaziun e per il dialog avert. Da sia vart è ella interessada d'avair er en l'avegnir in contact direct cun la banca naziunala. Ils chantuns èn pertutgads da differents svilups che han lur origin en la politica monetara internaziunala.
La delegaziun da la banca naziunala svizra ha cumpiglià la direcziun cumpletta da trais persunas cun Thomas Jordan, president, cun Jean-Pierre Danthine, vicepresident, e cun Fritz Zurbrügg, commember da la direcziun. Accumpagnads èn els vegnids dal secretari general Peter Schöpf, da Jean-Pierre Jetzer, delegà da la banca naziunala svizra en la Svizra orientala, sco er d'Andreas Züllig, commember dal cussegl consultativ per economia da la Svizra orientala.
Fotografia agiuntada:
Las duas delegaziuns cun il president da la banca naziunala Thomas Jordan e cun il president da la regenza Hansjörg Trachsel (amez a sanestra) a Flem.
Il president da la regenza Hansjörg Trachsel beneventa il president da la banca naziunala Thomas Jordan (a dretga) en il Grischun.
Gremi: regenza
Funtauna: rg chanzlia chantunala dal Grischun