En la nova exposiziun speziala dal museum retic a Cuira sa tracti cumplainamain dal tema "tissi". L'exposiziun cun quatter differents lieus dal malfatg dura dals 4 d'october 2013 fin ils 2 da mars 2014. Ina impressiun da l'exposiziun dat in nov video da la chanzlia chantunala dal Grischun sut www.gr.ch.

Assassinats istorics cun tissi fascineschan e fan pel-giaglina. Els inspireschan auturas ed auturs da crimi fin oz. Pli baud empruvavan las persunas pussantas da sa proteger cunter tissientadas cun agid d'objects magics u da persunas che sagiavan ordavant la spaisa. La tema era giustifitgada – però n'eran spaisas betg adina tissientadas intenziunadamain. Sa tissientar senza vulair cun victualias ch'eran idas a mal, cun bulieus dal graun maligns u cun scumbigliar ervas en la natira capitava bler pli savens.

Ozendi èn tissientadas da quest gener quasi svanidas, e quai grazia a frestgeras, a metodas da conservar cumprovadas ed a controllas da victualias exactas. E tuttina è la discussiun davart privels en victualias anc fitg actuala: È il glutamat in cundiment betg privlus? Contamineschan tissis per l'ambient nossa vivonda? È bio l'alternativa?

L'exposiziun intermediescha a maun da differents "lieus da delict" interessantas invistas en l'istorgia da l'alimentaziun fin al di dad oz. Examinai Vossas enconuschientschas davart tissis. 

Remartga:
Davart quest tema stat a disposiziun in video sut www.gr.ch. 
 

Infurmaziuns:
Andrea Kauer Loens, Manadra dal project per l'exposiziun speziala museum retic, tel. 081 257 48 30 
 

Gremi: museum retic
Funtauna: rg museum retic