La dretgira chantunala dal Grischun dumonda in'ulteriura plazza da derschadra u derschader en uffizi cumplain. Per quest intent èsi necessari da far ina revisiun parziala da la lescha davart l'organisaziun giudiziala. La regenza ha suttamess la revisiun parziala a la consultaziun.
La dretgira chantunala e la dretgira administrativa consistan oz da mintgamai tschintg derschadras e derschaders en uffizi cumplain. Per plirs motivs propona la dretgira chantunala da permetter ina plazza da derschadra u derschader supplementara cun midar la lescha davart l'organisaziun giudiziala.
Tenor la proposta da la dretgira è il dumber da cas s'augmentà permanentamain durant ils ultims onns. Ultra da quai saja la dretgira chantunala dapi quest onn l'unica instanza chantunala da recurs per il nov dretg da la protecziun d'uffants e da creschids. La chargia da lavur creschida haja er consequenzas sin la durada da las proceduras. Malgrà las stentas internas s'augmentia il mantun da pendenzas pli e pli, il dumber da proceduras pendentas saja creschì cuntinuadamain durant ils ultims onns. Oz saja da far quint cun dapli lavur pro cas da dretgira che pli baud. Quai difficulteschia anc la situaziun. Ils singuls cas sajan daventads marcantamain pli cumplexs ils ultims onns tant areguard il process sco er materialmain. Er il sistem da chombras ch'è vegnì introducì a la dretgira l'onn 2009 chaschuna, tenor la dumonda, considerablamain dapli lavur per las derschadras ed ils derschaders. Oz vegn la chargia da lavur a la dretgira dumagnada da sis chombras cun mintgamai trais derschadras e derschaders. Per las tschintg persunas giudizialas vul quai dir ch'ellas appartegnan a medem temp a pliras chombras. Plinavant menziuna la dretgira chantunala l'activitad pli intensiva per la surveglianza giudiziala da las dretgiras districtualas, da las autoritads da mediaziun sco er dals uffizis da scussiun e da concurs.
La regenza ha prendì enconuschientscha da la proposta da la dretgira chantunala. Pervia dal princip da la separaziun da las pussanzas e pervia dal dretg d'autonomia da la giustia, ch'è francà en la constituziun, na dastga la regenza betg examinar u valitar la proposta areguard il cuntegn. L'augment da tschintg a sis plazzas da derschadras u derschaders a la dretgira chantunala basegna ina revisiun parziala da la lescha davart l'organisaziun giudiziala, perquai ch'il dumber da derschadras e derschaders da las dretgiras chantunalas supremas è fixà en la lescha. Tar la revisiun da la lescha ha la regenza lantschà ina consultaziun.
Remartga:
La consultaziun dura fin ils 17 da schaner 2014. Ils documents pon vegnir consultads en l'internet sut
www.gr.ch / Consultaziuns currentas.
Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail
Christian.Rathgeb@djsg.gr.ch
Gremi: regenza
Funtauna: rg chanzlia chantunala dal Grischun