La regenza grischuna ha tractà la fatschenta federala davart il traffic d'aglomeraziun. Perquai che la confederaziun na prevesa naginas contribuziuns federalas per ils dus programs d'aglomeraziun dal chantun Grischun, refusa la regenza il conclus federal. 

La regenza refusa il conclus federal davart il traffic d'aglomeraziun
La regenza grischuna prenda posiziun davart il conclus federal davart la deliberaziun dals meds finanzials per il program "traffic d'aglomeraziun" a partir da l'onn 2015. Per il chantun Grischun èn vegnids inoltrads dus programs d'aglomeraziun. Tenor il sboz actual dal conclus federal n'è previsa nagina contribuziun federala per ils programs d'aglomeraziun Cuira e Tavau. Quai pervia da la relaziun insuffizienta tranter ils custs ed il niz. 
La regenza grischuna refusa il conclus federal en sia furma actuala, en spezial er perquai ch'ils documents, ch'èn vegnids inoltrads posteriuramain per las aglomeraziuns Tavau e Cuira, n'èn insumma gnanc anc vegnids resguardads. Plinavant na va la regenza betg d'accord cun la metodica ch'è vegnida applitgada per giuditgar ils projects d'aglomeraziun. Ella crititgescha che las prestaziuns furnidas preliminarmain sco er la realisabladad facila dals programs sajan vegnidas resguardadas memia pauc. La regenza crititgescha plinavant ch'il giudicament haja ina differenziaziun manglusa. Ella è da l'avis ch'il niz saja cumprovà tar tuts dus projects d'aglomeraziun en il Grischun e che quest niz saja vegnì sutvalità en il rom da l'emprim giudicament. La regenza supplitgescha la confederaziun da resguardar sias objecziuns. 
 

Da vischnancas e da regiuns

• Cuira: La revisiun parziala da la planisaziun locala, concludida da la citad da Cuira ils 22 da november 2012, vegn approvada. La revisiun cumpiglia in plan general d'avertura 1:7500 "Zonas betg surbajegiablas". Ultra da vias champestras cuntegna quest plan er ina plazza da partenza per parasguladers.
• Degen: La revisiun parziala da la planisaziun locala dals 14 da december 2012, concludida da la vischnanca da Degen (dapi il 1. da schaner 2013 vischnanca da Lumnezia), vegn approvada cun resalvas. Ultra da l'adattaziun dal plan da zonas e dal plan general d'avertura è er la lescha da construcziun da l'anteriura vischnanca da Degen vegnida suttamessa ad ina revisiun totala. La lescha da construcziun da l'onn 1992, ch'era valaivla fin ussa, sto vegnir adattada a la legislaziun surordinada. Uschia duai er vegnir garantida l'execuziun da la lescha en vista al nov uffizi da construcziun da la vischnanca fusiunada da Lumnezia cun otg differentas leschas da construcziun.
• Jenins: La revisiun totala da la planisaziun locala, concludida da la vischnanca da Jenins ils 28 e 29 d'avust 2012, vegn approvada cun ina correctura e cun resalvas. La revisiun cuntegna ina repassada totala da l'urden fundamental. In punct central da la planisaziun locala è – ultra da l'adattaziun dals instruments da planisaziun a la legislaziun actuala surordinada – er la meglieraziun da la protecziun dal maletg dal lieu.
• Schiers: Il project da la vischnanca da Schiers dal zercladur 2013 per il rempar dal Schraubach vegn approvà sut tschertas cundiziuns. Als custs per il rempar dal Schraubach vegnan concedidas las contribuziuns federalas e chantunalas per la correcziun dal curs d'aua sco er la contribuziun chantunala per la construcziun da vias da totalmain 320 400 francs.

Contribuziuns chantunalas a differentas instituziuns 

• Chasa da persunas attempadas e da tgira Falveng: Per il project da construcziun da la chasa da persunas attempadas e da tgira Falveng a Domat vegn garantida ina contribuziun chantunala d'investiziun da maximalmain 6 600 000 francs. Il project prevesa da transfurmar chombras da dus letgs en chombras d'in letg sco er da crear 39 letgs da tgira supplementars. 

Gremi: regenza
Funtauna: rg chanzlia chantunala dal Grischun