L'elavuraziun da l'istorgia da las mesiras repressivas per motivs da provediment e dals plazzaments en in lieu ester sin plaun federal avanzan. Sin recumandaziun da la maisa radunda nominada duai vegnir stgaffì in fond d'agid immediat per persunas ch'èn stadas pertutgadas da mesiras repressivas per motivs da provediment e da plazzaments en in lieu ester avant l'onn 1981. Il Grischun sa participescha a l'installaziun da quest fond cun ina contribuziun da 120 611 francs. Persunas pertutgadas che sa chattan actualmain en ina situaziun d'urgenza duain pudair survegnir agid finanzial en moda svelta e nunbirocratica.

En connex cun l'elavuraziun da l'istorgia da las mesiras repressivas per motivs da provediment e dals plazzaments en in lieu ester fin l'onn 1981 che la confederaziun ha prendì per mauns ha la regenza designà la primavaira 2013 sco mesiras immediatas l'uffizi dal servetsch social chantunal (post da cussegliaziun per l'agid a victimas) sco post uffizial da contact e da cussegliaziun per dumondas en connex cun anteriuras mesiras repressivas per motivs da provediment e plazzaments en in lieu ester. L'archiv dal stadi l'ha incumbensà da sustegnair persunas directamain pertutgadas tar la tschertga da las actas respectivas sco er tar il prender invista da talas. Mez avust 2013 èn autoritads, dretgiras, posts d'administraziun ed ulteriurs organs sco er instituziuns publicas e privatas che pudessan posseder actas vegnids rendids attents cun ina brev a la problematica ed a las prescripziuns legalas.
Sin plaun federal è vegnida installada ina maisa radunda, a la quala sa participeschan represchentanzas da las persunas pertutgadas e da las autoritads, da las baselgias e da l'uniun purila svizra. La maisa radunda tschertga vias per elavurar politicamain e scientificamain quest chapitel stgir da l'istorgia sociala da la Svizra. Latiers tutga er la dumonda da prestaziuns finanzialas a las persunas pertutgadas. Ils chantuns èn represchentads a la maisa radunda tras la conferenza da las directuras e dals directurs chantunals dals affars socials.

Il Grischun sa participescha a la furmaziun d'in fond d'agid immediat che vegn installà sin basa voluntara cun ina contribuziun da 120 611 francs. Il fond duai tut en tut disponer da 7 fin 8 milliuns francs. Ultra da donaziuns da persunas privatas e da contribuziuns d'instituziuns e d'organisaziuns vegnan ils chantuns dumandads da dar in contribuziun ch'è vegnida calculada sin basa da lur dumber da la populaziun, independentamain dal dumber da persunas pertutgadas.
Igl è previs d'incumbensar la chadaina da fortuna (partiziun "agid social en Svizra") d'administrar il fond e da tractar las dumondas da sustegn. Il pli tard l'atun 2014 duain vegnir pajadas prestaziuns en daners a persunas en situaziuns d'urgenza.
Sut la batgetta da la confederaziun vegn ultra da quai examinada l'installaziun d'in fond per cas da direzza e da solidaritad. D'in tal fond per cas da direzza survegnissan oravant tut persunas prestaziuns ch'èn traumatisadas e che han grondas difficultads socialas, economicas e da la sanadad pervia d'ina mesira repressiva per motivs da provediment e che vivan anc oz en ina situaziun difficila. Per installar in tal fond sto vegnir stgaffida ina basa legala correspundenta. Perquai resguarda la regenza l'installaziun dal fond d'agid immediat sco raschunaivel.

Per tut las persunas ch'èn stadas pertutgadas fin l'onn 1981 da mesiras repressivas per motivs da provediment e da plazzaments en in lieu ester stat a disposiziun il post da cussegliaziun per l'agid a victimas (post da cussegliaziun per l'agid a victimas dal Grischun, Loëstrasse 37, 7000 Cuira, tel. 081 257 31 50). L'archiv dal stadi (archiv dal stadi dal Grischun, Karlihofplatz, 7000 Cuira, tel. 081 257 28 03) sustegna persunas directamain pertutgadas a tschertgar actas da pli baud. 


Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
- Andrea Mauro Ferroni, manader da l'uffizi dal servetsch social chantunal dal Grischun, tel. 081 257 26 54, e-mail: Andrea.Ferroni@soa.gr.ch  


Gremi: regenza
Funtauna: rg chanzlia chantunala dal Grischun