A chaschun da sia ultima sesida ha la regenza grischuna tractà differentas revisiuns da planisaziuns localas communalas. Plinavant ha la regenza concedì contribuziuns – tranter auter a favur dals campiunadis mundials da skis 2017 a San Murezzan. 

Da vischnancas e da regiuns 

• Cazas: La revisiun totala da la planisaziun locala, concludida da la vischnanca da Cazas ils 13 da december 2012, vegn approvada cun resalvas. Tras la revisiun totala vegn stgaffida ina planisaziun locala cumplessiva per la vischnanca da Cazas che ha fusiunà per il 1. da schaner 2010. Betg approvadas na vegnan la determinaziun d'ina zona da construcziun en il territori Sorts sco er ina nova zona d'abitar a Preaz. La procedura d'approvaziun per la zona Gianal en il sectur da l'entrada en il territori da skis Gianal-Lescha vegn sistida, fin che l'admissibladad d'abitaziuns secundaras explotadas e betg explotadas è sclerida. Plinavant sto la vischnanca far in inventari dals abitadis e designar – sin basa da quest inventari – ils areals d'abitadi ch'èn degns da vegnir mantegnids.
• Valragn: Il plan da zonas 1:1000 "Revisiun parziala (zona da protecziun da la natira Grossmatta)", concludì da la vischnanca da Valragn ils 12 da december 2013, vegn approvà.
• Luzein: Il plan da zonas / plan general da furmaziun 1:2000 "Buchen – Lunden" dals 16 da zercladur 2006 vegn approvà er areguard la zona dal vitg ch'era vegnida determinada sin la parcella nr. 874.
• Saas: La revisiun parziala da la planisaziun locala da la vischnanca da Saas, concludida ils 29 da november 2013, vegn approvada. Tras il nov med da planisaziun vegn fixada en spezial l'avertura dal territori Martels cun ina via.
• Val Stussavgia: La revisiun totala da la planisaziun locala da la vischnanca da Valendau (dapi il 1. da schaner 2013 vischnanca da Val Stussavgia), concludida ils 20 da november 2012, vegn approvada. Ils instruments da planisaziun da l'anteriura vischnanca da Valendau èn vegnids repassads cumplettamain.
• Ziràn-Reschen: La revisiun parziala da la planisaziun locala, concludida da la vischnanca da Ziràn-Reschen ils 12 da november 2013, vegn approvada. Tras la revisiun parziala vegn principalmain la parcella nr. 75 transferida da la zona per stabiliments publics a la zona da mastergn Nislas.
• Zuoz: La revisiun parziala da la lescha da construcziun, concludida da la vischnanca da Zuoz ils 16 da schaner 2013, vegn approvada.
• San Murezzan: A la vischnanca da San Murezzan vegn garantida ina contribuziun chantunala da 2,7 milliuns francs en il rom dal concept per implants da sport d'impurtanza naziunala (CISIN) per renovar las pistas dal cup mundial da skis alpin. Resalvada resta la concessiun tras il cussegl grond. En il rom da la missiva tar il quint 2013 vegn la regenza a dumandar il cussegl grond in credit d'impegn. Tras la renovaziun planisada da las pistas dal cup mundial duain vegnir creadas las premissas per manar tras ils campiunadis mundials da skis alpin da la FIS 2017. Ils custs d'investiziun per renovar las pistas dal cup mundial a San Murezzan importan 11,95 milliuns francs.
• Bravuogn: Il project "Protecziun cunter crudada da crappa Glatscheras, sectur B", che l'uffizi da guaud e privels da la natira ha inoltrà per incumbensa da la Viafier retica, vegn approvà. I vegn garantida ina contribuziun da maximalmain 525 000 francs. Tras il project vegn meglierada la protecziun da la lingia da viafier sco er da la via chantunala cunter crudada da crappa. Per quest intent vegnan installadas raits da protecziun cunter crudada da crappa d'ina lunghezza totala da 123 meters.
• Tschappina: Per restaurar il tetg da plattamorta da la baselgia evangelica en la vischnanca da Tschappina, Obertschappina, vegn garantida ina contribuziun da maximalmain 29 400 francs en il rom da la tgira da monuments.

Contribuziuns chantunalas a differentas instituziuns 

• Fundaziun Scola-dimora a Cuira: La regenza ha approvà in project da la fundaziun Scola-dimora a Cuira che prevesa da concepir da nov ils conturns da la scola-dimora. I vegn garantida ina contribuziun da construcziun da maximalmain 507 000 francs. Tras il project da construcziun vegn eliminada ina situaziun da traffic nuncuntentaivla, ed il traffic da vehichels vegn separà dal traffic da peduns. Medemamain vegn augmentada la valur concepziunala da l'entir areal da la Scola-dimora a Cuira. La dumonda da construcziun è vegnida inoltrada a la citad da Cuira.
• Uniun Campiunadis mundials da skis alpin da la FIS 2017 a San Murezzan: A l'uniun Campiunadis mundials da skis alpin da la FIS 2017 a San Murezzan vegn garantida ina contribuziun chantunala da maximalmain 2,3 milliuns francs per ils campiunadis mundials da skis 2017 (contribuziun fixa: 2/3; contribuziun da deficit: 1/3). La contribuziun effectiva importa maximalmain la mesadad dals daners che la vischnanca resp. la destinaziun paja en connex cun ils campiunadis mundials da skis. Resalvada resta l'approvaziun da la contribuziun chantunala tras il cussegl grond. En il rom da la missiva tar il quint 2013 vegn la regenza a dumandar il cussegl grond in credit d'impegn. Per ils campiunadis mundials da skis 2017 quintan ils organisaturs cun custs da 60,576 milliuns francs. Betg resguardadas en ils custs d'organisaziun n'èn las infrastructuras restantas che vegnan finanziadas da la vischnanca da San Murezzan e promovidas separadamain dal chantun (vesair qua survart tar "Da vischnancas e da regiuns" / San Murezzan).
• Uniun JWOC/SOW 2016 Engiadina: Per repassar las chartas da cursa d'orientaziun per il campiunadi mundial da cursa d'orientaziun dals juniors (JWOC) e per la cursa d'orientaziun internaziunala da plirs dis "Swiss Orienteering Week" (SOW) l'onn 2016 en Engiadina vegn concedida ina contribuziun da maximalmain 85 390 francs or dal fond da sport. Las chartas da cursa d'orientaziun vegnan elavuradas tras l'uniun JWOC/SOW 2016 Engiadina.

Projects da vias
Ultra da quai ha la regenza approvà totalmain 8,203 milliuns francs per lavurs da construcziun sin ils suandants trajects:
- via da l'Alvra, Bravuogn – Preda: lavurs d'impressari e da cuvrida, remplazzament per la punt da Zavretta
- via d'Avras: lavurs d'impressari, Farera – Plan Davains
- via dal Landwasser: lavurs d'impressari, punt a spunda Tieftobel 2
- via dal Lucmagn: lavurs d'impressari e da cuvrida, reparaziun da la punt dal Rain da Medel
- via da Ratitsch: lavurs d'impressari, kilometer 0,57 – 1,48
- via da St. Antönien: lavurs d'impressari, nov trassé Röza – bi dr Suscht, sutpassadi da la viafier 
 

Gremi: regenza
Funtauna: rg chanzlia chantunala dal Grischun