Las classas da qualitad dal traffic public inditgan quant bain ch'in lieu è accessibel cun il traffic public. L'uffizi per il svilup dal territori e l'uffizi d'energia e da traffic han retschertgà cuminaivlamain l'onn 2013 questa basa per il chantun Grischun. Il resultat: tut en tut è l'avertura tras il traffic public buna en il Grischun. Pervia da la differenta colonisaziun dal chantun datti però cleras differenzas regiunalas. Ils plans pon vegnir consultads sur l'internet. 

Impurtant per planisar purschidas dal traffic ed abitadis
Classas da qualitad dal traffic public èn indicaturs impurtants per pudair giuditgar l'avertura tras il traffic public. Uschia sa laschan ils connexs tranter il traffic e l'abitadi resguardar meglier en la planisaziun dal territori, e la coordinaziun tranter quests dus secturs po vegnir optimada. A maun da las classas da qualitad dal traffic public poi pia vegnir constatà, quant bain ch'ina parcella, in zona da lavur u d'abitar u ina instituziun (publica) cun bler public è accessibla cun il traffic public. Cumbinadas cun las infurmaziuns ch'èn er avant maun davart il dumber da las abitantas e dals abitants e da las plazzas da lavur per hectara resultan infurmaziuns, sch'in territori è – cumpareglià cun ils umans che vivan u lavuran là – avert memia pauc u memia fitg. Uschia daventan las classas da qualitad dal traffic public ina basa impurtanta per la planisaziun dal traffic e dals abitadis sco er per decisiuns da tut gener per in lieu. 

Metoda e classificaziun da las classas da qualitad dal traffic public
Per l'attribuziun ad ina classa da qualitad dal traffic public vegnan resguardadas las fermadas dal traffic public respectivas e lur cuntanschibladad en minutas a pe, il gener dal med da transport (viafier, bus, pendiculara sco spezialitad) sco er ils intervals dal tact (dumber dals curs). I existan las suandantas classas da qualitad:
- classa da qualitad A: avertura fitg buna en qualitad urbana
- classa da qualitad B: buna avertura en qualitad urbana
- classa da qualitad C: avertura en qualitad urbana (p.ex. intervals da 15 minutas dal bus)
- classa da qualitad D: avertura media (p.ex. intervals d'ina ura da la Viafier retica)
- classa da qualitad E: avertura da basa cun concentraziuns
- classa da qualitad F: avertura da basa 

Buna avertura per 33 pertschient da las abitantas e dals abitants e per 48 pertschient da las persunas occupadas
Tut en tut è il Grischun accessibel pulit bain cun il traffic public:
- 63 500 abitantas ed abitants (33 pertschient) e 60 500 persunas occupadas (48 pertschient) profitan d'ina avertura en qualitad urbana, quai vul dir per exempel d'ina colliaziun da bus cun intervals da 15 minutas u pli frequents (classas da qualitad A, B e C).
I dat però grondas differenzas regiunalas:
- A Cuira e conturns, nua ch'i sa chatta dapli che la mesadad da las plazzas da lavur dal Grischun, profitan 42 pertschient da la populaziun e 52 pertschient da las persunas occupadas da bunas colliaziuns dal traffic public.
- Bain accessibels durant la stagiun principala èn ils centers turistics, particularmain las regiuns da l'Engiadin'ota e da Tavau-Partenz.
- Las autras regiuns dal Grischun han per gronda part in'avertura da las classas da qualitad D, E ed F. En territoris, nua ch'igl exista (er stagiunalmain) ina dumonda correspundenta dal traffic public, è avant maun ina concentraziun correspundenta da l'avertura da basa. 
 
Motiv da las classas da qualitad dal traffic public
Las classas da qualitad dal traffic public n'èn betg ina "invenziun" dal Grischun, ellas èn gia vegnidas retschertgadas en blers auters chantuns, p.ex. en il chantun Berna. Cun raschun: Cun ina buna coordinaziun dal svilup da l'abitadi e dal svilup dal traffic sa laschan reducir considerablamain ils problems dal traffic e bleras immissiuns per l'ambient. En il Grischun ha il traffic public ultra da quai ina impurtanza turistica. Ils giasts profitan, sche lur arrivadas sa chattan en vischinanza da fermadas ch'èn bain accessiblas. La lescha federala davart la planisaziun dal territori ch'è entrada en vigur il 1. da matg 2014 prescriva ultra da quai che zonas d'abitar e da lavurar duain vegnir planisadas en lieus ch'èn accessibels cunvegnentamain cun il traffic public. Perquai ston las classas da qualitad dal traffic public er vegnir resguardadas tar decisiuns davart l'ulteriur svilup da l'abitadi.
Las classas da qualitad dal traffic public èn vegnidas eruidas per la stagiun principala e per la stagiun bassa, quai per l'onn 2013 ed er per l'onn 2025 pervia da las supposiziuns futuras da l'urari. Per planisar il svilup da l'abitadi è la purschida durant l'entir onn impurtanta per l'onn 2025. La definiziun da las classas da qualitad sa basa sin ina norma da l'associaziun svizra da las spezialistas e dals spezialists per vias e per il traffic (VSS). 

Consultabel en l'internet
Il rapport e tut en tut diesch plans davart las classas da qualitad dal traffic public pon vegnir consultads en tudestg en l'internet sut www.are.gr.ch (Dienstleistungen / Grundlagen / ÖV-Güteklassen). 


Infurmaziuns:
Dumondas concernent la planisaziun dal traffic respunda:
Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch  
Dumondas concernent la planisaziun dal territori respunda:
Richard Atzmüller, manader da l'uffizi per il svilup dal territori dal Grischun, tel. 081 257 23 21, e-mail Richard.Atzmueller@are.gr.ch  
Dumondas tecnicas concernent l'utilisaziun dal sistem d'infurmaziun geografica SIG respunda:
Hansjürg Tschudi, uffizi per il svilup dal territori dal Grischun, tel. 081 257 29 08, e-mail Hansjuerg.Tschudi@are.gr.ch  
 

Gremi: uffizi per il svilup dal territori / uffizi d'energia e da traffic
Funtauna: rg uffizi per il svilup dal territori / uffizi d'energia e da traffic