La confederaziun ha approvà e deliberà per la realisaziun tut ils projects grischuns a favur da la qualitad da la cuntrada ch'eran vegnids inoltrads. La qualitad da la cuntrada po uschia vegnir promovida en tut il chantun Grischun. Quai è ina gronda schanza per las cuntradas cultivadas multifaras en il chantun. En tut èn vegnids elavurads l'onn 2013 – sut la direcziun da l'uffizi d'agricultura e da geoinfurmaziun – 17 projects regiunals a favur da la qualitad da la cuntrada.

Tras la nova politica agrara da la confederaziun 2014 fin 2017 vegnan concedids per l'emprima giada pajaments directs per prestaziuns a favur da la qualitad da la cuntrada sin las surfatschas utilisadas da l'agricultura ed en il territori d'alpegiada. La confederaziun sustegna cun quest nov instrument mesiras regiunalas per promover la diversitad da las cuntradas cultivadas. En connex cun la realisaziun survegnan ils chantuns ina gronda libertad d'agir. Tut las mesiras planisadas ston però represchentar ina prestaziun per la cuntrada ed avair in connex direct cun la cultivaziun agricula.

Il chantun Grischun ha inoltrà a la confederaziun tut en tut 17 projects regiunals a favur da la qualitad da la cuntrada. L'uffizi federal d'agricultura ha ussa approvà tut ils projects, uschia che quests projects pon vegnir realisads en l'entir chantun. Promovidas vegnan la cultivaziun da culturas a favur da la diversitad da l'utilisaziun, sco p.ex. la cultivaziun dals ers alpins, surfatschas cun diversas culturas alternantas sco er culturas spezialas. Indemnisads vegnan ultra da quai ils custs supplementars che resultan tras la cultivaziun da surfatschas fitg structuradas. Per exempel sch'i sto vegnir segà enturn bostgs e crappa e sch'i ston vegnir mantegnids foss d'aua e saivs. Cun allontanar chaglias da prads e pastgiras sco er cun ina cultivaziun adattada duai vegnir impedì che adina dapli surfatschas preziusas per la cuntrada creschian en.

Las cuntradas en il Grischun èn caracterisadas da prads e pastgiras fitg structuradas, da la cultivaziun dad ers, da curtins da pumera cun bist aut, da prads sitgs, dad aclas e dad alps. Cun contribuziuns a favur da la qualitad da la cuntrada po vegnir promovì il mantegniment da questa cuntrada cultivada natirala sco spazi da recreaziun per la populaziun ed il turissem. Uschia vegni garantì che las cuntradas regiunalas en il Grischun sa sviluppian vinavant en il rom da las finamiras definidas per la cuntrada e che las lavurs ed ils custs supplementars correspundents a favur d'ina cuntrada cultivada multifara vegnian indemnisads en mintga regiun. 
 

Fotografia agiuntada: Pumera cun bist aut en flur en la Tumleastga 
 

Remartga:
Davart quest tema stat a disposiziun in video sut www.gr.ch: 31.01.2014: "Qualitad da la cuntrada grischuna"


Infurmaziuns:
Valentin Luzi, uffizi d'agricultura e da geoinfurmaziun, tel. 081 257 24 01, e-mail Valentin.Luzi@alg.gr.ch  


Gremi: uffizi d'agricultura e da geoinfurmaziun
Funtauna: rg uffizi d'agricultura e da geoinfurmaziun