L'institut d'assicuranza sociala dal chantun Grischun duai vegnir organisà tenor ils princips da la public corporate governance. La regenza ha deliberà ina missiva correspundenta per mauns dal cussegl grond.

La noziun "public corporate governance" descriva ils princips per organisar e per regular las unitads administrativas excorporadas, per che talas furneschian prestaziuns effizientas. La finamira è ina relaziun equilibrada tranter la gestiun e la controlla da las participaziuns dal chantun. L'onn 2010 ha il cussegl grond prendì enconuschientscha en senn affirmativ dal rapport concernent la realisaziun da la public corporate governance en il chantun Grischun.

En spezial per ils instituts autonoms da dretg public è la public corporate governance da gronda impurtanza. Per concepir er l'organisaziun da l'institut d'assicuranza sociala (IAS) tenor questas directivas, propona la regenza al cussegl grond ina revisiun da la lescha. En emprima lingia vegnan pretendids ils suandants puncts da revisiun: La cumissiun administrativa n'è betg pli il post da surveglianza dal IAS, mabain ses organ directiv strategic. La regenza è il post chantunal che surveglia il IAS, ed ella è cumpetenta per eleger la cumissiun administrativa e per designar il presidi ed il vicepresidi. Ina commembra u in commember da la regenza na po betg pli far part da la cumissiun. La cumissiun administrativa sezza designescha la direcziun e deliberescha il rapport annual sco er il quint annual per mauns da la confederaziun e dal chantun.

Il cussegl grond vegn a tractar la fatschenta en la sessiun d'avust 2014. 
 

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail Hansjoerg.Trachsel@dvs.gr.ch  
 

Gremi: regenza
Funtauna: rg chanzlia chantunala dal Grischun