Il dumber da tschiervs che passenta l'enviern en il Grischun ha cuntanschì la marca da 15 000 animals ed uschia ina grondezza anc supportabla. La chatscha duai permetter d'evitar consequenzas negativas per il spazi da viver, en spezial per ils guauds da protecziun, ma er per ils animals sezs. Necessaria è ina gronda intervenziun tras la chatscha.

Bleras chatschadras e blers chatschaders van a chatscha or da gust ed or da passiun. La chatscha sa legitimescha però pir, sch'ella vegn chapida sco obligaziun e sco incumbensa e sch'ella vegn er exequida en questa moda. Ils effectivs da selvaschina "productivs" (tschierv, chavriel, chamutschs en las regiuns bassas, capricorns en Engiadina, portgs selvadis en il Grischun dal sid) ston vegnir regulads en lur dumber, per mitigiar uschè bain sco pussaivel las consequenzas negativas per lur spazi da viver. Igl è incontestà che la selvaschina tutga er en il guaud. Perquai ston vegnir tolerads donns vi da bostgs giuvens en il guaud, sch'els na surpassan betg ina tscherta limita. La dimensiun dals donns sto dentant restar en in rom adequat a la cuntrada cultivada e na dastga betg reducir la funcziun da dal guaud da protecziun cunter privels da la natira. Bundant dus terzs dal guaud dal Grischun protegian cunter privels da la natira.

L'incumbensa la pli impurtanta resta la regulaziun da l'effectiv da tschiervs 
L'enviern 2013/14 è crudada ina quantitad da naiv extraordinaria al sid da las Alps. Grazia a la regulaziun consequenta dals effectivs da selvaschina e grazia a la mancanza d'ina perioda fraida pli lunga èn las perditas tras selvaschina disgraziada stadas mo mesaunas er en questas regiuns. Anc adina ston ins presumar ch'i dettia en il chantun Grischun in effectiv da tschiervs da 15 000 chaus la primavaira. L'effectiv s'augmenta cunzunt en las regiuns bassas. L'adempliment dals plans da prelevaziun è en questas regiuns ina premissa indispensabla per regular cun success l'effectiv da tschiervs. Ils tschiervs che han vivì questa primavaira en il Grischun èn sa multiplitgads en il fratemp per almain in terz. Uschia sto l'effectiv vegnir reducì per almain 5 000 animals ils proxims 10 mais, sch'el na duai betg pli crescher vinavant. La chatscha grischuna da patenta sto prestar la gronda part per cuntanscher questa regulaziun. Il plan da prelevaziun ha l'intent da sajettar 4 655 tschiervs. En quasi tut las regiuns resta el en la dimensiun da l'onn precedent. En la regiun da Favugn è el vegnì diminuì per 20 tschiervs pervia da l'influenza dal triep lufs dal Calanda. Ils experiments da pilot per ina cultivaziun subtila en parts d'asils da selvaschina cuntinueschan.
Las analisas davart las migraziuns da la populaziun da tschiervs en il Reticon èn terminadas e vegnan publitgadas en in rapport final che cumpara il proxim enviern. Da nov è vegnì lantschà in project per survegliar e per sclerir las migraziuns dals tschiervs en il territori da cunfin tranter la Mesolcina ed il chantun Tessin. Là han ins pudì proveder enfin ussa 18 tschiervs cun in emettur. Tuts dus projects han la finamira d'obtegnair enconuschientschas pli exactas davart la dimensiun ed ils termins da las migraziuns dals tschiervs suror ils cunfins.
Ils cas da tuberculosa ch'èn vegnids constatads tar ils tschiervs dal Vorarlberg e dal Tirol sforzan il chantun Grischun da far scleriments correspundents. Per quest intent vegnan rimnadas las provas necessarias en il Partenz ed en l'Engiadina bassa vers la fin da l'atun. 

Nova unitad da registraziun per animals sajettads: Sectur empè da vischnanca 
Ina novaziun impurtanta pertutga las indicaziuns davart il lieu, nua che l'animal è vegnì sajettà. Ina indicaziun correcta dal lieu, nua che l'animal è vegnì sajettà è necessaria ord vista da la planisaziun da chatscha ed ord vista da la polizia da chatscha. Pervia da las fusiuns da vischnancas che han lieu cuntinuadamain sto vegnir remplazzà il sistem vertent da registrar il lieu da prelevaziun sur il num da la vischnanca. Per la nova unitad da registraziun vegn il chantun repartì en secturs. Quests secturs s'orienteschan principalmain vi dals cunfins geografics. Ils secturs èn represchentads sin ina charta ch'è agiuntada a la glista da prelevaziun. A partir dal 1. d’avust pon els er vegnir consultads en l'internet sut www.jagdkarte.gr.ch. 

Chatscha sin chavriels e sin chamutschs senza grondas midadas 
La chatscha sin ansiels-chavriel ch'è vegnida realisada en l'Engiadina, en la Val Müstair ed en la Bregaglia sco experiment da pilot durant ils ultims 2 dis da la chatscha auta vegn extendida sin 4 dis. Da nov na vegn ina tala prelevaziun betg pli messa a quint al contingent da trais, mabain al contingent supplementar.
Tar la chatscha sin chamutschs datti quest onn mo ina midada: En la Tumleastga, sin la Mantogna e da la vart dretga da la Val Schons vegn extendida la chatscha sin chauras-chamutsch da 13 a 17 dis. 


Infurmaziuns:
- dr. Georg Brosi, uffizi da chatscha e pestga, tel. 081 257 38 92, e-mail Georg.Brosi@ajf.gr.ch  
- Hannes Jenny, biolog da selvaschina, uffizi da chatscha e pestga, tel 081 257 38 92, e-mail Hannes.Jenny@ajf.gr.ch  


Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun