Ensemen cun l'uffizi da militar e da protecziun civila (UMPC) ha l'uffizi per la segirezza da victualias e per la sanadad d'animals (USVA) examinà ils 2 d'october 2014 a Haldenstein quant buns che ses scenaris da crisa èn sin il stgalim d'in manaschi agricul. Quai ha el fatg a maun d'ina erupziun fictiva d'ina epidemia regiunala. Per quest intent è vegnida simulada l'erupziun da la zoppina en ina tratga d'arments. Eliminar il gnieu da l'epidemia e minimar ils donns tras in agir svelt e correct èn stadas las finamiras principalas da l'acziun. 

Sin l'entir mund è la zoppina anc adina ina da las epidemias d'animals las pli gravantas. Bain n'è ella betg privlusa per l'uman, ma ils donns na sa restrenschan betg mo sin ils animals e sin l'agricultura, mabain han consequenzas bler pli vastas. Quai han mussà las erupziuns realas da l'ultim temp en Engalterra (2001, 2007) ed en Ollanda (2001) cun suffrientschas per ils animals e cun grondas perditas per l'agricultura e per il territori rural. Actualmain cumbatta l'Africa dal nord (Algeria, Tunesia) cunter erupziuns da la zoppina. La zoppina datti sin l'entir mund anc en blers pajais. Da princip è in'erupziun perquai pussaivla da tut temp er en il chantun Grischun. La Svizra è fin oz stada schanegiada da la zoppina. 

Temp da reacziun e rutina sco clav da success 
Sch'ina epidemia d'animals fitg contagiusa vegn percepida svelt, pon vegnir prendidas en moda pli sistematica mesiras per minimar u schizunt evitar ina derasaziun. L'observaziun dals animals tras la pura u il pur, in cumportament correct tras la veterinaria u il veterinari e la surveglianza dal traffic da persunas e d'animals giogan en quest connex ina rolla decisiva en in cas serius. Perquai organiseschan il USVA ed il UMPC mintga onn in exercizi da plirs dis per esser preparads per tals cas. 

Collavuraziun tranter il USVA ed il UMPC sco pitga dal cumbat cunter epidemias d'animals 
Il veterinari uffizial dal USVA è scolà per sclerir epidemias d'animals fitg contagiusas ed è equipà cun ina valisch per epidemias d'animals. El examinescha ils animals, prenda provas da labor per confermar la diagnosa, sclerescha moviments dals animals ed ordinescha mesiras da bloccada per la tratga pertutgada.
Ils piuniers da cumbat cunter epidemias dal UMPC realiseschan las mesiras da bloccada al lieu, surveglian quellas, gidan il USVA a mazzar ed a dismetter ils animals infectads, nettegian e dischinfecteschan las localitads e las surfatschas entaifer il territori bloccà. L'acziun è ina grevezza fisica e psichica fitg gronda per ils piuniers da cumbat cunter epidemias. 

Facit da l'exercizi da cumbat cunter epidemias 2014 
Cun satisfacziun èsi vegnì constatà che tut las persunas participadas han ademplì fitg bain lur incumbensas e che l'exercizi da cumbat cunter epidemias ha pudì vegnir realisà cun success. En cooperaziun cun las autoritads, cun la firma da dismessa e cun ils possessurs d'animals è il cas d'epidemia vegnì exercità en tut ils secturs en moda speditiva, effizienta e realistica. Ina giada dapli èsi sa mussà che las enconuschientschas fatgas cun quest exercizi èn fitg utilas ed impurtantas per planisar las ulteriuras acziuns da questa truppa. 
 
Remartga:
Davart quest tema stat a disposiziun in film sut www.gr.ch. 
 

Infurmaziuns:
- dr. med. vet. Rolf Hanimann, veterinari chantunal, tel. 081 257 24 11, e-mail: rolf.hanimann@alt.gr.ch  
- Hans Gasser, manader da l'uffizi da militar e da protecziun civila, tel. 081 257 35 22, e-mail: hans.gasser@amz.gr.ch  
 

Gremi: uffizi per la segirezza da victualias e per la sanadad d'animals / uffizi da militar e da protecziun civila
Funtauna: uffizi per la segirezza da victualias e per la sanadad d'animals / uffizi da militar e da protecziun civila