L'onn 2013 èn vegnidas sustegnidas en il chantun Grischun 1460 persunas tras l'agid social. Quai correspunda a 2325 persunas resp. a 1460 cas. Cumpareglià cun l'onn precedent èn quai bundant 140 persunas resp. 90 cas dapli. Per l'emprima giada dapi l'onn 2010 è er s'augmentada la quota d'agid social dal chantun – dad 1,1 ad 1,2 pertschient. Anc adina è il Grischun tranter ils chantuns cun las quotas las pli bassas da tut la Svizra. Quai mussan ils resultats da la statistica svizra d'agid social da l'Uffizi federal da statistica (UST).

Quota d'agid social levamain pli auta
Ils onns 2010 fin 2012 è la quota d'agid social en il chantun Grischun stada stabila tar 1,1 pertschient. L'onn 2013 s'augmenta ella per 0,1 puncts procentuals sin 1,2 pertschient ed è uschia sin il nivel da l'onn 2009. La quota d'agid social variescha tut tenor il district. Il pli bass è ella cun 0,4 pertschient en ils districts da Malögia e dal Bernina, il pli aut en il district da la Plessur (2,4%). Ma er questa quota maximala dal chantun Grischun è anc adina cleramain sut la media svizra da 3,1 pertschient (2012).
Durada da retratga dals cas currents e dals cas terminads
La durada da retratga dals cas currents s'augmenta da 24 sin 25 mais (median) cumpareglià cun l'onn precedent. Uschia s'augmenta ella levamain dapi 2 onns. Stgars 30 pertschient dals cas currents retiran agid social durant fin 1 onn, bun dus terzs fin 4 onns.
La durada da retratga dals cas terminads è tar 11 mais, quai che correspunda a la valur da l'onn precedent. La mesadad dals cas terminads retira agid social durant main che 1 onn, bun dus terzs durant main che 2 onns.

Midadas tar il stadi civil
Guardà sur ils 3 onns passads èn las quotas da las persunas che retiran agid social sa spustadas tenor stadi civil. Durant la perioda numnada è la quota da persunas maridadas s'augmentada cuntinuadamain (2011: 29,7%, 2012: 30,0%, 2013: 31,4%), la quota da persunas divorziadas è percunter sa reducida (2011: 22,6%, 2012: 21,0%, 2013: 20,4%).

Augment da persunas cun activitad da gudogn
Dapi l'onn 2011 sa mussa er in augment da persunas cun activitad da gudogn. Durant la medema perioda è sa reducida la quota da persunas senza activitad da gudogn. Latiers tutgan persunas en scolaziun (senza emprendists), persunas che lavuran en il tegnairchasa, persunas pensiunadas, persunas temporarmain incapablas da lavurar, persunas permanentamain invalidas sco er persunas che n'han naginas schanzas sin il martgà da lavur.
Svilup da la structura dals cas
Dapi 3 onns crescha la quota da cas d'ina persuna. En il fratemp èn quai stgars dus terzs dals cas. Sco cas d'ina persuna vegnan considerads cas da persunas che vivan sulettas, ma er cas da persunas che na vivan betg sulettas. Questas ultimas èn persunas che furman in agen cas d'agid social, che vivan dentant ensemen cun ina u pliras autras persunas, per exempel en ina cuminanza d'abitar. Durant la medema perioda è sa reducida la quota da persunas ch'educheschan sulettas. En il chantun Grischun è questa quota tar 20,5 pertschient. 9,4 pertschient da tut ils cas èn cas da pèrs cun uffants, 4,2 pertschient cas da pèrs senza uffants. Bunamain in terz (28,7%) da tut las persunas che retiran agid social èn uffants tranter 0 e 17 onns. La statistica svizra d'agid social
En il chantun Grischun vegnan las datas registradas dapi l'onn 2004 en il rom da la statistica svizra d'agid social che vegn fatga da l'Uffizi federal da statistica (UST). L'indicatur il pli impurtant da la statistica d'agid social è la quota d'agid social. El è l'indicatur per il ristg da daventar dependent da prestaziuns da l'agid social. La quota d'agid social è definida sco part da las persunas che survegnan agid social durant l'onn da retschertga, cumpareglià cun la populaziun permanenta ils 31 da december da l'onn precedent tenor STATPOP. Ulteriuras infurmaziuns e publicaziuns en furma electronica chattan ins sin la pagina d’internet dal UST. 


Infurmaziuns:
- Andrea Mauro Ferroni, manader da l'Uffizi dal servetsch social dal Grischun, tel. 081 257 26 51, e-mail: andrea.ferroni@soa.gr.ch  
- Jan Boruvka, UST, secziun Agid social, tel. 058 463 66 02, e-mail: jan.boruvka@bfs.admin.ch  
- Simon Dinkel, Post spezialisà per la statistica d'agid social Turitg e Svizra orientala, tel. 043 259 75 33, e-mail: simon.dinkel@statistik.ji.zh.ch


Gremi: Uffizi federal da statistica, Uffizi dal servetsch social dal Grischun
Funtauna: rg Uffizi federal da statistica, Uffizi dal servetsch social dal Grischun