Tras la refurma dal territori en il chantun Grischun resulta ina restructuraziun parziala da las dretgiras grischunas. Las dretgiras districtualas d'enfin ussa vegnan remplazzadas l'onn 2017 tras las dretgiras regiunalas. La regenza ha tramess en consultaziun ina revisiun parziala correspundenta da la lescha davart l'organisaziun giudiziala.

Sco ulteriura etappa per realisar la refurma dal territori, ch'il pievel grischun ha approvà l'onn 2012, vegnan stgaffidas 11 dretgiras regiunalas. Sco dretgiras chantunalas inferiuras exequeschan ellas – empè da las dretgiras districtualas – la giurisdicziun civila e penala. Las dretgiras regiunalas duain vegnir concepidas analogamain a la regulaziun actuala da la dretgira chantunala. Uschia vegnan per exempel il quint ed il preventiv da mintga dretgira regiunala integrads en il quint resp. en il preventiv dal chantun. Qua tras daventan las dretgiras regiunalas ina part directa da la corporaziun territoriala dal chantun Grischun. Nagina influenza n'ha la refurma da las dretgiras sin la nominaziun da las derschadras e dals derschaders da las dretgiras regiunalas. Talas e tals vegnan elegids sco fin ussa da las votantas e dals votants da la regiun respectiva.

Per statuir las dretgiras regiunalas sco dretgiras chantunalas inferiuras sto la lescha davart l'organisaziun giudiziala vegnir suttamessa ad ina revisiun parziala. 22 ulteriuras leschas ston vegnir adattadas, cunquai che numerus relaschs chantunals sa refereschan a las noziuns "district", "dretgira districtuala" e "presidenta u president da la dretgira districtuala". Ils relaschs pertutgads vegnan adattads a la nova terminologia en il rom da la revisiun parziala da la lescha davart l'organisaziun giudiziala. Las midadas duain entrar en vigur il 1. da schaner 2017. Las derschadras ed ils derschaders da las dretgiras regiunalas ston vegnir elegids en il decurs da l'onn 2016. La perioda d'uffizi cumenza directamain suenter la perioda d'uffizi da las derschadras districtualas e dals derschaders districtuals actuals. Las derschadras districtualas ed ils derschaders districtuals elegids restan en uffizi fin ils 31 da december 2016. Fin la fin da l'onn 2016 correspundan las secziuns da dretgira als districts actuals.

La consultaziun tar la refurma da las dretgiras dura fin ils 11 da mars 2015. Ils documents pon vegnir consultads sin www.gr.ch / Consultaziuns currentas. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail christian.rathgeb@djsg.gr.ch  
 

Gremi: regenza
Funtauna: rg chanzlia chantunala dal Grischun