La regenza grischuna beneventa l'avertura cumpletta dal martgà d'electricitad. Plinavant approvescha ella l'ordinaziun davart l'obligaziun da tir per la chatscha e la revisiun parziala da l'ordinaziun da la regenza davart la chatscha.
La regenza beneventa l'avertura cumpletta dal martgà d'electricitad
La regenza grischuna beneventa l'avertura cumpletta dal martgà d'electricitad che vegn prendida en mira cun la segunda etappa da l'avertura dal martgà d'electricitad. Tras questa liberalisaziun pon tut las consumentas e tut ils consuments tscherner sez en l'avegnir, da tge furnitur ch'els vulan retrair l'electricitad. La confederaziun vuless plinavant che las utilisadras ed ils utilisaders possian tscherner mintga onn tranter il provediment da basa ed il martgà liber. Perquai propona ella il model da tscherna cun provediment d'electricitad garantì (model PEG). La regenza grischuna propona dentant da desister d'introducir quest model PEG. Sche las consumentas finalas ed ils consuments finals midassan vi e nà tranter il provediment da basa ed il martgà liber, giess quai cumplainamain sin donn e cust dals gestiunaris da raits indigens.
Ulteriuras infurmaziuns: Text da la consultaziun
Cumprovar la segirezza da culp per dastgar ir a chatscha
La regenza grischuna approvescha l'ordinaziun davart l'obligaziun da tir per la chatscha e la revisiun parziala da l'ordinaziun da la regenza davart la chatscha.
Las chatschadras ed ils chatschaders ston exercitar lur segirezza da culp ed absolver il tir per la regulaziun da lur arma da chatscha. Da nov vegn il tir obligatoric per la regulaziun da l'arma da chatscha collià cun ina norma da prestaziun. Cun retrair la patenta da chatscha stoi vegnir cumprovà ch'ins haja absolvì persunalmain il tir per la regulaziun da l'arma da chatscha e che la norma da prestaziun saja vegnida ademplida. Per ademplir l'obligaziun da tir e per survegnir la conferma correspundenta ston las chatschadras ed ils chatschaders pajar ina taxa da 15 francs en la chamona da tir. La cumprova da la segirezza da culp sto vegnir introducida da tut ils chantuns sin basa da l'ordinaziun federala da chatscha.
290 contingents d'abitaziuns da vacanzas per il chantun Grischun
Per l'onn 2015 survegn il chantun Grischun 290 contingents da la confederaziun per permetter l'acquist d'abitaziuns da vacanzas tras persunas a l'exteriur. La regenza ha repartì ils contingents da permissiun sco suonda: 240 contingents per objects en surbajegiadas cumplettas e 50 contingents per l'acquist d'objects singuls. Ultra da quai pon ils 286 contingents che n'èn betg vegnids duvrads l'onn precedent vegnir transferids sin l'onn current. L'ordinaziun federala davart las abitaziuns secundaras, che limitescha la construcziun da novas abitaziuns secundaras dapi il 1. da schaner 2013 en la gronda part da las vischnancas grischunas, n'excluda betg l'acquist da bains immobigliars da vacanzas tras persunas a l'exteriur.
Gremi: regenza
Funtauna: rg chanzlia chantunala dal Grischun