La cumissiun per ambient, traffic ed energia (CATE) ha predeliberà la missiva da la regenza concernent l'iniziativa cunter la chatscha speziala e propona da declerar quella sco nunvalaivla. 

Sut la direcziun dal president Andreas Felix ed en preschientscha dal cusseglier guvernativ Mario Cavigelli ha la CATE predeliberà la missiva tar l'iniziativa chantunala dal pievel per abolir la chatscha speziala (iniziativa cunter la chatscha speziala). La maioritad da la cumissiun propona al cussegl grond da declerar l'iniziativa cunter la chatscha speziala sco nunvalaivla. Ella suonda uschia la proposta da la regenza. Ina minoritad da la cumissiun sustegna la valaivladad da l'iniziativa.
L'iniziativa dal pievel ch'è vegnida inoltrada en furma d'ina proposta elavurada pretenda ina revisiun parziala da la lescha chantunala da chatscha. Tenor quella stuessan ils plans da prelevaziun annuals vegnir ademplids da nov dal tuttafatg durant la chatscha ordinaria. I stuess vegnir desistì da reglar ils effectivs da selvaschina en il rom d'ina chatscha speziala ils mais da november e da december. Sco cumpensaziun duess la chatscha auta vegnir prolungada per 4 dis da 21 sin 25 dis e durar cun interrupziuns fin maximalmain la fin d'october.
La lavur da la cumissiun è stada quella d'examinar, sche l'iniziativa cunter la chatscha speziala è giuridicamain valaivla. La maioritad da la cumissiun è vegnida a la conclusiun che l'iniziativa cunter la chatscha speziala stettia en cuntradicziun evidenta cun il dretg federal surordinà (lescha da chatscha e lescha da guaud). Quai sin fundament d'ina expertisa giuridica ch'è vegnida pretendida da la regenza, d'ina expertisa areguard la biologia da la selvaschina sco er d'explicaziuns supplementaras da la regenza a chaschun da la sesida da la cumissiun. Cun las enconuschientschas fatgas propona la maioritad da la cumissiun al cussegl grond da declerar l'iniziativa dal pievel per abolir la chatscha speziala sco nunvalaivla. La maioritad da la cumissiun excluda ina decleranza da nunvalaivladad parziala. La minoritad da la cumissiun sustegna la valaivladad da l'iniziativa. Il cussegl grond vegn a tractar l'iniziativa cunter la chatscha speziala en la sessiun da favrer 2015. 
 

Infurmaziuns:
president da la cumissiun Andreas Felix, tel. 079 445 50 71 
 

Gremi: cumissiun per ambient, traffic ed energia
Funtauna: rg cumissiun per ambient, traffic ed energia