A chaschun da sia ultima sesida ha la regenza grischuna deliberà contribuziuns finanzialas per il concept da svilup da l'Engiadina bassa sco er per il project per il svilup regiunal da Churwalden. Ultra da quai ha ella approvà la revisiun parziala da la planisaziun locala da Fideris. 
 
Il chantun sustegna il concept da svilup da l'Engiadina bassa
La regenza grischuna garantescha a l'interpresa Energia Engiadina SA in sustegn finanzial per il project "Concept da svilup da l'Engiadina bassa". Las instituziuns localas enturn la Energia Engiadina SA ch'èn responsablas per il project vulan realisar en Engiadina bassa in center d'innovaziun. En cooperaziun cun interpresas ch'èn dependentas da l'export ed en cumbinaziun cun novs models da lavur duai la regiun uschia vegnir rendida duraivlamain pli attractiva sco plazza economica, sco lieu da lavur e sco domicil.
En il rom da la nova politica regiunala da la confederaziun (NPR) survegn il project tut en tut ina contribuziun da maximalmain 365 000 francs, la quala vegn surpigliada mintgamai per la mesadad dal chantun e da la confederaziun. Cun la politica regiunala vegnan territoris en las regiuns ruralas, en las regiuns da muntogna ed al cunfin svizzer sustegnids per realisar lur programs da svilup. La direcziun en chaussa han ils chantuns. 

Contribuziun al project per il svilup regiunal da Churwalden
Il chantun Grischun deliberescha ina contribuziun maximala da var 562 000 francs per il project per il svilup regiunal (PSR) da Churwalden. Questa contribuziun dal chantun premetta ina cuntraprestaziun da la confederaziun. Quella sustegna il project cun passa 700 000 francs.
L'associaziun Chascharia d'alp Parpan sco purtadra dal project prevesa tranter auter da construir ina chascharia d'alp, da realisar occurrenzas gastronomicas cumplettadas cun purschidas culturalas en la stalla communabla Churwalden sco er da crear ina purschida da pernottar sin l'alp Pradaschier. Las mesiras agroturisticas han la finamira da promover la valurisaziun regiunala cun entradas supplementaras per l'agricultura. 

Nominà in cumissari da la regenza per Bravuogn
La regenza grischuna engascha in cumissari da la regenza per la vischnanca da Bravuogn. Il motiv èn renfatschas da la cumissiun communala da gestiun a l'adressa da la suprastanza communala. En il center da la dispita stat l'adattaziun dals pretschs per la furniziun da stalizzas per l'implant da chalur a distanza che vegn manà dapi blers onns da la vischnanca.
Il cumissari da la regenza sto examinar pli detagliadamain, sche las renfatschas èn plausiblas, e trair las conclusiuns necessarias. Fin il pli tard la fin da matg 2015 preschenta il cumissari da la regenza a la regenza in rapport davart ses scleriments sco er davart sias conclusiuns. Alura vegni ad esser l'incumbensa da la regenza da prender las mesiras ch'èn eventualmain necessarias. Sco cumissari da la regenza è vegnì nominà l'advocat Thomas Nievergelt da Samedan. Ils custs van sin donn e cust da la vischnanca da Bravuogn. 

La revisiun parziala da la planisaziun locala da Fideris vegn approvada
La revisiun parziala da la planisaziun locala, concludida da la vischnanca da Fideris ils 7 da favrer 2014, vegn approvada. Ils suandants singuls meds da planisaziun èn vegnids deliberads: la revisiun parziala da la lescha da construcziun, il plan da zonas e plan general da furmaziun 1:2000 "Interpresa da plattas pressadas" sco er il plan general d'avertura 1:2000 "Interpresa da plazzas pressadas". Cun la revisiun parziala vegnan stgaffidas las premissas da la planisaziun dal territori per pudair trair a niz meglier l'areal betg duvrà da l'anteriura interpresa da plattas pressadas. 
 

Gremi: regenza
Funtauna: rg chanzlia chantunala dal Grischun