En sia ultima sesida ha la regenza grischuna prendì posiziun davart l'ordinaziun federala da chatscha e davart la strategia concernent las raits d'electricitad.
La regenza beneventa per gronda part la revisiun parziala da l'ordinaziun federala da chatscha
La regenza beneventa explicitamain che l'ordinaziun federala da chatscha differenziescha da nov tranter la regulaziun da rotschas lufs e mesiras cunter singuls lufs. I vegn er beneventà ch'ils chantuns dastgan conceder da nov exclusivamain las permissiuns da sajettar singuls lufs che fan donns considerabels tar animals da niz. La regenza renviescha però anc ina giada a la problematica da l'execuziun en connex cun il dretg da recurs da las organisaziuns per la protecziun da l'ambient. L'execuziun dals concepts "Urs en Svizra", "Luf-tscherver en Svizra" e "Luf en Svizra" resp. da las disposiziuns respectivas da la legislaziun federala da chatscha na po betg vegnir garantida, sch'i pon vegnir fatgs illimitadamain recurs cun effect suspensiv cunter disposiziuns da sajettada dals chantuns.
La regenza prenda posiziun tar la strategia concernent las raits d'electricitad
Il project da consultaziun per la strategia concernent las raits d'electricitad cuntegna pass en la dretga direcziun. Quai constatescha la regenza en ina posiziun cuminaivla cun la conferenza da las regenzas dals chantuns alpins (CRCA). Cun il project vul la confederaziun meglierar las cundiziuns generalas per engrondir e per mantegnair las raits svizras d'electricitad. Ils chantuns alpins han in interess elementar che l'electricitad che vegn producida en lur regiuns cun agid da la forza idraulica possia vegnir transportada senza impediments als centers da consum. Il project da consultaziun cuntegna però numerus aspects che na pon vegnir sustegnids. Uschia duai per exempel la construcziun da conducts sutterrans vegnir fixada da nov sco princip general. La regenza grischuna punctuescha ch'ils conducts sutterrans sajan da princip da beneventar or da l'optica da la cuntrada sco er da l'ecologia, ma tuttina stoppian ins – pervia da las relaziuns topograficas e pervia da la pitschna spessezza da consum – avair il dretg da colliar regiuns muntagnardas e territoris rurals vinavant cun conducts libers.
Fegliet infurmativ tar la strategia concernent las raits d'electricitad
Aboliziun da la tariffa da dazi privilegiada per imports da charn cundida
En Svizra dastga charn cundida vegnir importada en moda pli favuraivla che charn betg tractada. Cun ina iniziativa parlamentara duain questas tariffas da dazi privilegiadas vegnir abolidas ussa per prevegnir a disturbis dal martgà ed a l'omissiun da la tariffa da dazi pli auta per charn. Il sboz da la lescha qua avant maun prevesa che products da charn cundida duain da nov vegnir categorisads e suttamess uschia ad ina chargia da dazi pli gronda. En sia posiziun declera la regenza grischuna ils motivs per e cunter la midada da la tariffa da dazi. Particularmain per branschas che dependan da l'import da quests products avessan las midadas dischavantatgs gravants. Uschia è la branscha en il Grischun che producescha charn setga pertutgada spezialmain d'in eventual augment da la tariffa da dazi sin l'import da charn cundida, perquai ch'ella dovra quests products importads per producir pulpa da bov che stat en ina concurrenza directa cun charn setga da l'exteriur, sco per exempel la bresaola. Ord vista dal chantun Grischun predomineschan ils motivs per ina decisiun da betg entrar en chaussa. Tuttina èn ils problems che vegnan chaschunads da la situaziun vertenta bain chapaivels. Perquai propona il chantun che l'administraziun federala da duana duai far dapli controllas per evitar abus.
La regenza grischuna sustegna la strategia naziunala cunter las resistenzas a l'antibiotica
Las resistenzas a l'antibiotica s'augmentan – er en Svizra. La confederaziun cumbatta cunter quest problem cun ina strategia naziunala cun ina vasta basa. Davart questa strategia cunter las resistenzas a l'antibiotica (StAR) prenda la regenza grischuna posiziun. La strategia previsa vegn sustegnida, success empermetta en spezial la via tschernida da "One Health". Quella cumpiglia – sper la sanadad da l'uman – er la sanadad dals animals, l'agricultura, la segirezza da victualias e da nutriment sco er l'ambient. En la formulaziun definitiva da la strategia ston las mesiras prendidas en mira però vegnir priorisadas en moda pli clera. Ultra da quai è la rolla dals chantuns tar la controlla e tar l'execuziun descritta en moda pauc precisa e sto perquai vegnir sclerida.
Ulteriuras infurmaziuns: pagina d'internet davart StAR da l'uffizi federal da
sanadad publica
Nova divisiun dals reviers forestals dal Grischun
La regenza ha approvà ina nova divisiun dals reviers forestals. Ils reviers Alvra (aboliziun dals reviers Alvagni-Schmitten, Belfort dadora, Bravuogn, Filisur e Mon), Ziràn Muntogna da Schons (aboliziun dals reviers Muntogna da Schons e Ziràn-Reschen) sco er S-chanf – Zuoz (aboliziun dals reviers S-chanf e Zuoz) èn vegnids furmads da nov. Il dumber da reviers è pia vegnì reducì per 6 a da nov 75 reviers. La divisiun dals reviers vegn adattada retroactivamain per il 1. da schaner 2015. Resguardond las ulteriuras fusiuns da vischnancas e da manaschis èsi da far quint er en il futur cun midadas dals reviers forestals.
Legenda: preschentaziun generalisada dals 75 reviers forestals dal chantun
Contribuziuns federalas e chantunalas per construir da nov la sutgera e per in indriz d'ennavar a Silvaplauna
A la Corvatsch SA vegn garantì – cun resalva d'ina finanziaziun totala reglada – in emprest NPR da la confederaziun da 2 milliuns francs per construir da nov la sutgera Curtinella e per in indriz d'ennavar a Silvaplauna. Supplementarmain vegn garantida ina contribuziun chantunala da circa 337 000 francs. Quest project prevesa da remplazzar il runal existent tras ina sutgera che serva sco colliaziun impurtanta dals dus territoris da skis Furtschellas e Corvatsch. Il medem mument duai vegnir construì in nov indriz d'ennavar per questa pista da colliaziun impurtanta tranter Corvatsch e Furtschellas.
Per realisar quest project ha la vischnanca da Silvaplauna concludì ils 17 da favrer 2010 ina revisiun parziala da la planisaziun locala. Tscherts meds da planisaziun èn vegnids deliberads da la regenza gia l'avust 2010. Suenter l'inoltraziun d'ulteriurs documents ha la regenza approvà en sia ultima sesida anc il plan da zonas 1:5000 "Corvatsch, pista che maina giu la val" sco er il plan general d'avertura 1:5000 "Provediment e dismessa Corvatsch, pista che maina giu la val".
La regenza approvescha la revisiun parziala da la planisaziun locala da la vischnanca da Glion
La revisiun parziala da la planisaziun locala da la vischnanca da Glion dals 28 da settember 2014 che sa referescha ad in project vegn approvada cun remartgas. La revisiun parziala cumpiglia ina cumplettaziun da la lescha da construcziun, il plan da zonas e plan general da furmaziun 1:2000 "Revisiun parziala" sco er il plan general d'avertura 1:2000 "Revisiun parziala". La finamira da la revisiun parziala è quella da realisar ina halla per elavurar laina sco er in edifizi da biro. La laina elavurada vegn alura duvrada en l'ovra termoelectrica a laina en la fracziun da Castrisch.
Approvaziun da la correcziun da la via da Pusserein
La regenza ha approvà il project d'exposiziun per la correcziun da Pusserein, spartavias Pusserein – Stettli, cun cundiziuns e cun permissiuns dal dretg spezial. La via da Pusserein è ina via chantunala da colliaziun che collia la fracziun da Pusserein che tutga tar la vischnanca da Schiers. La via stretga na correspunda betg pli als basegns ed a las pretensiuns da segirezza actualas.
Gremi: regenza
Funtauna: rg chanzlia chantunala dal Grischun