La regenza da la provinza autonoma Bulsaun–Tirol dal sid ha visità oz – sin invitaziun da la regenza grischuna – il chantun Grischun. En il center dals discurs èn stads il traffic da cunfin, las pendularias ed ils pendularis da cunfin ed il provediment d'energia.

Il tema principal dal discurs da lavur dad oz tranter las duas regenzas è sta quel d'intensivar la collavuraziun en il traffic public transcunfinal. La regenza grischuna sa legra da l'electrificaziun da la Viafier dal Vnuost e da l'extensiun correspundenta da la purschida. In augment da las capacitads dals trens sco er la colliaziun directa tranter Mals e Buslaun en il tact d'ina ura èn ina nova schanza per concepir da nov las raits dal traffic public tranter il Grischun ed il Tirol dal sid. Per pudair meglierar las colliaziuns Scuol–Puntina e Mals–Puntina, han las regenzas prendì en consideraziun da schliar la tematica d'in bun lieu central a Danuder (Tirol) cun la regenza dal Tirol dal nord. Ina colliaziun da viafier senza interrupziun tranter il Grischun ed il Tirol dal sid è stà in ulteriur tema. Las regenzas han discutà ils resultats d'in studi ch'è s'occupà da variantas pussaivlas per ina nova colliaziun da viafier tranter l'Engiadina bassa ed il Vnuost Sura. In punct central dals discurs è ultra da quai stà quel da transfurmar l'attatg actual da current d'urgenza tranter il Vnuost e la Val Müstair en ina colliaziun permanenta. Cun questa mesira pudess vegnir meglierà considerablamain il provediment d'energia da las duas regiuns. A pled è vegnida plinavant la tematica da las pendularias e dals pendularis da cunfin sco er in'eventuala cooperaziun en la commerzialisaziun da purschidas turisticas.

Las regenzas han er tractà la strategia europeica ch'è en elavuraziun per il territori alpin (Eusalp). Il Grischun ed il Tirol dal sid èn commembers dal comité directiv che accumpogna las lavurs da strategia da la cumissiun da la UE. Las regenzas han accentuà ch'ellas vulan s'engaschar vinavant communablamain per rinforzar ils territoris da muntogna e per dar dapli paisa sin plaun europeic a las regiuns alpinas.

Suenter il discurs da lavur è stà in gentar cuminaivel sin il program sco er ina visita da la construcziun brutta dal museum d'art dal Grischun. Il barat d'opiniuns che ha lieu mintga onn tranter las regenzas da Bulsaun–Tirol dal Sid e dal Grischun è daventà tradiziun. Dapi 1999 sa scuntran las regenzas regularmain per discurs da lavur. Oz è la regenza grischuna sa scuntrada per l'emprima giada cun il guvernatur Arno Kompatscher ch'è en uffizi dapi l'onn 2014 e cun ina delegaziun da sia regenza.


Fotografia agiuntada: