La regenza grischuna ha concludì ina revisiun parziala da l'ordinaziun da linguas. Tenor la lescha da linguas vertenta dal chantun Grischun vegnan las vischnancas attribuidas ad in tschert territori linguistic tranter auter sin fundament da la part procentuala da la cuminanza linguistica tradiziunala. Dapi l'onn 2010 na vegn la dumbraziun federala dal pievel betg pli realisada en furma d'ina retschertga cumpletta. Perquai mancava fin ussa la pussaivladad d'actualisar las datas. Questa largia ha la regenza ussa serrà tras ina revisiun parziala da l'ordinaziun chantunala da linguas.

La versiun adattada da l'ordinaziun da linguas prevesa d'actualisar las datas statisticas per tschertas vischnancas. Concretamain fa il chantun retschertgas sin dumonda da quellas vischnancas, en las qualas la quota da la cuminanza linguistica tradiziunala è tranter 50 e 20 pertschient. Per exempel valan vischnancas sco puramain rumantschas respectivamain puramain talianas, sche almain 40 pertschient da las persunas che abitan là èn rumantschas respectivamain talianas. Sco plurilinguas valan vischnancas, sche passa 20 pertschient da las persunas che abitan là èn rumantschas respectivamain talianas.
Las datas vegnan retschertgadas da nov sin plaun communal, e quai en furma da retschertgas cumplettas. Ils custs vegnan surpigliads mintgamai per la mesadad da la vischnanca e dal chantun. Retschertgas da datas correspundentas dastgan vegnir repetidas il pli baud suenter 10 onns. Disposiziuns spezialas valan la finala per vischnancas ch'èn sa furmadas or da fusiuns da vischnancas monolinguas e/u plurilinguas cun vischnancas tudestgas. En tals cas ston las datas vegnir retschertgadas separadamain entaifer il perimeter da las anteriuras vischnancas.
Politica da linguas dal chantun Grischun


Infurmaziuns:
president da la regenza Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch 
 

Gremi: regenza
Funtauna: rg chanzlia chantunala dal Grischun