"Quant è memia bler?" è la devisa da la nova campagna naziunala cunter l'alcohol. Il chantun Grischun sa participescha activamain a la campagna da plirs partenaris. Uschia èn planisadas er en il Grischun differentas activitads per l'emna da dialog naziunala davart l'alcohol.

La confederaziun lantscha en collavuraziun cun ils chantuns e cun ulteriurs partenaris da la prevenziun da dependenza la campagna cunter l'alcohol "Quant è memia bler?". L'element central da la campagna è l'emna da dialog naziunala davart l'alcohol che ha lieu dals 30 d'avrigl fin ils 9 da matg 2015. Sia finamira è quella da discutar cun la populaziun sur dal tema "alcohol" e da la sensibilisar per ils privels d'in consum d'alcohol memia grond. 

Acziuns en il Grischun
Il chantun Grischun sa participescha a la campagna naziunala cunter l'alcohol en il rom dal program grischun cunter l'alcohol. Cun inserats en las medias localas vegni rendì attent a la campagna.
Ultra da quai s'engascha la magistraglia dal stgalim superiur da Grüsch activamain en l'emna da dialog cun in di da prevenziun. Ils 5 da matg 2015 vegni discutà davart l'alcohol cun classas da scola. Scolaras e scolars maschaidan coctails senza alcohol per la populaziun dal vitg e giogan il musical "Abgestürzt". Dal tuttafatg en il senn da la campagna è il di local da prevenziun a Grüsch in bun exempel, co ch'il dialog public cun tut las generaziuns po vegnir lantschà en moda constructiva.
Ulteriuras infurmaziuns: campagna naziunala cunter l'alcohol

Fegliet infurmativ davart il consum d'alcohol en Svizra
 

Infurmaziuns:
Denise Rudin, uffizi da sanadad, vicemanadra dal program grischun cunter l'alcohol,
tel. 081 257 64 02 u 078 746 42 20, e-mail: Denise.Rudin@san.gr.ch 
 

Gremi: partiziun "promoziun da la sanadad e prevenziun"
Funtauna: rg uffizi da sanadad dal Grischun