En sia ultima sesida approvescha la regenza la sanaziun e la renovaziun dal stabiliment d'accumulaziun Punt dal Gall da las Ovras electricas d'Engiadina. Ultra da quai deliberescha ella contribuziuns chantunalas per las ovras da protecziun "Muot" da la Viafier retica, per l'engrondiment da la via da guaud Salez da la vischnanca da Churwalden sco er per la renovaziun dal provediment d'aua da la vischnanca d'Urmagn.
La sanaziun e la renovaziun dal stabiliment d'accumulaziun Punt dal Gall da las Ovras electricas d'Engiadina vegnan approvadas
Il project "Retrofit" da las Ovras electricas d'Engiadina SA (OEE) per sanar e per renovar il stabiliment d'accumulaziun Punt dal Gall vegn approvà cun cundiziuns e cun pretensiuns. La regenza relascha las permissiuns necessarias per realisar il project.
Las OEE utiliseschan dapi l'onn 1970 la forza idraulica dal Spöl en l'ovra electrica Ova Spin. Per accumular durant in onn l'aua da l'ovra electrica serva il lai da fermada Livigno cun il mir da fermada Punt dal Gall. Las OEE planiseschan per ils onns 2015 e 2016 diversas lavurs da sanaziun e da renovaziun vi da quest mir da fermada. Previs èsi da sanar la tschiffada d'aua da manaschi e da reveder las clappas da fermada sco er da sanar il scul da basa. Cun reveder las turbinas da dotaziun vegn a medem temp plazzada l'entrada pli ensi. Ultra da quai vegnan sanadas resp. revedidas la stgargiada d'aua gronda e las clappas d'aua gronda sco er renovads u substituids divers indrizs accessorics e sistems d'agid dal stabiliment d'accumulaziun. Plinavant vegnan sanads ils sondagis da drenascha e d'impulsiun che vegnan duvrads per survegliar il mir da fermada. La finala èn anc previsas lavurs vi da la riva dal lai da la vart svizra sco er vi da la protecziun da las scarpas a la riva taliana.
Il lai da fermada Livigno sa chatta per gronda part ed il mir da fermada per part sin territori talian. Il stgalim da l'ovra electrica Punt dal Gall – Ova Spin è in stabiliment transcunfinal. Ils dretgs d'utilisaziun da l'aua per quest stgalim èn vegnids concedids dal cussegl federal a las OEE.
Sin fundament da las enconuschientschas ch'ins ha fatg cun l'accident dal Spöl a Pasca 2013 vegnan las OEE a desister da svidar il lai sco ch'igl era previs oriundamain ed a realisar las lavurs da sanaziun e da renovaziun cun sfunsar. Tar l'accident dal Spöl è il provediment cun aua restanta nunspetgadamain sa stagnà. L'avertura dal stabiliment d'accumulaziun Punt dal Gall ch'ins ha ordinà alura ha bain chaschunà ch'il letg da l'aual è puspè sa bagnà, ma a medem temp èn er vegnidas inducidas grondas quantitads da sediments fins en il Spöl. Ina svidada dal lai en connex cun las lavurs da sanaziun vegniss ad augmentar la ristga d'ina ulteriura mobilisaziun dals sediments fins.
Stabiliment d'accumulaziun Punt dal Gall © OEE – Ovras electricas d'Engiadina SA
Approvà la segunda etappa da las ovras da protecziun "Muot" da la Viafier retica
La regenza approvescha il project "Protecziun cunter lavinas e cunter crudada da crappa Muot (etappa 2)" da la Viafier retica. Als custs vegn garantida ina contribuziun chantunala da maximalmain 1 350 000 francs.
La finamira dal project qua avant maun è quella da garantir en moda persistenta la protecziun da la lingia da l'Alvra da la Viafier retica. Questa lingia vala sco impurtant traject principal en direcziun da l'Engiadina ed ha cun circa 60 trens per di ina gronda intensitad dal traffic. Numerus eveniments da la natira sco per exempel il grev enviern da lavinas 1975 han fatg donn als rempars existents. Il sistem da protecziun cumplessiv en il territori "Muot" ha perquai survegnì per part largias. Las novas mesiras da protecziun vegnan realisadas en duas etappas. En il project qua avant maun da la segunda etappa vegnan construids rempars da lavinas e raits cunter crudada da crappa. Ultra da quai vegnan sanads ed allontanads mirs sitgs.
La regenza approvescha l'engrondiment da la via da guaud Salez da la vischnanca da Churwalden
Il project "Engrondiment da la via da guaud Salez" da la vischnanca da Churwalden vegn approvà da la regenza. Als custs vegn garantida ina contribuziun chantunala da maximalmain 672 000 francs.
Ils guauds da la vart dretga da la val sur Churwalden èn vegnids determinads sco guauds da protecziun. Els protegian il territori d'abitadi, la via chantunala e la via da colliaziun locala cunter lavinas e bovas. Il territori vegn traversà da tschintg auals. Pervia da questa situaziun speziala vegn il territori pertutgà vaira savens da bovas superfizialas e da bovas da scarpas. Per garantir a lunga vista la funcziun da protecziun ston ils guauds vegnir tgirads e cultivads correspundentamain. La via da guaud "Salez" dat l'avertura a l'entir territori. Questa via è circa 70 onns veglia e na correspunda betg pli a las pretensiuns dad oz areguard la ladezza, la capacitad e la segirezza.
Contribuziun per renovar il provediment d'aua da la vischnanca d'Urmagn
Per renovar il provediment d'aua da la fracziun d'Urmagn survegn la vischnanca d'Urmagn ina contribuziun chantunala da maximalmain 263 340 francs.
Urmagn è ina vischnanca pitschna da tempra fermamain agricula cun in agen provediment d'aua per il vitg. Quest provediment d'aua è collià cun quel pli ensi da la fracziun d'Urmagn Sura. A chaschun da l'inspecziun dal provediment d'aua da baiver dals 22 d'avust 2012 ha l'uffizi per la segirezza da victualias e per la sanadad d'animals (USVA) constatà ch'i dat diversas mancanzas e divers donns vi dals stabiliments da provediment. Il reservuar d'Urmagn e las chombras d'aua n'adempleschan betg las pretensiuns da qualitad vertentas da la segirezza da victualias. En il rapport d'inspecziun ha il USVA perquai disponì da sanar il provediment d'aua d'Urmagn.
Gremi: regenza
Funtauna: rg chanzlia chantunala dal Grischun