Il chantun Grischun ha publitgà quest onn per la 18. giada ina concurrenza per promover la lavur culturala professiunala per projects gronds. En tut èn vegnids inoltrads 46 projects.
La concurrenza è vegnida annunziada il schaner 2015 en la pressa quotidiana grischuna, il termin d'annunzia è scadì mez mars 2015. La cumissiun da concurrenza ha giuditgà 46 dumondas ch'èn vegnidas inoltradas en las suandantas spartas: art applitgà (4), art figurativ (20), film (3), istorgia e memoria (2), litteratura (4), musica (8), saut (2) e teater (3).
Cun las contribuziuns ad ovras promova il chantun Grischun projects culturals artisticamain interessants, independents e realisabels. Las contribuziuns vegnan pajadas ad artistas ed artists che demussan in potenzial da svilup en lur activitad. Il sustegn finanzial als duai procurar la libertad necessaria per elavurar lur ideas e lur projects e per sviluppar vinavant lur activitad artistica. Ils criteris per la selecziun èn la professiunalitad e l'autenticitad d'in concept, la confruntaziun seriusa e profunda cun la cumpetenza professiunala sco er l'originalitad e la vardaivladad.
Il departament d'educaziun, cultura e protecziun da l'ambient ha decidì – sin proposta da la cumissiun da concurrenza e da l'uffizi da cultura – davart la surdada da las contribuziuns ad ovras. Las suandantas diesch artistas ed artists survegnan ina contribuziun ad in'ovra d'in import da mintgamai 20 000 francs:
Num: Jann Duri Bantli
Sparta: Litteratura, istorgia e memoria
Titel: Project da cudesch "Marco Camenisch"
Num: Pascal Gamboni
Sparta: Musica
Titel: Project da musica "Paisch el cor per Paul Anselma"
Num: Ursina Giger
Sparta: Musica
Titel: Project da musica "Ursina fa in album"
Num: Silvio Huonder
Sparta: Litteratura
Titel: Project da cudesch "Rauch"
Num: Alvin Muoth
Sparta: Musica
Titel: Grond oratori mundan per chor e per orchester, "Egl artg dils meins" che sa basa sin 12 texts nunpublitgads da dr. Arnold Spescha
Num: Cordula Seger
Sparta: Istorgia e memoria
Titel: "Chesa sur l'En a San Murezzan – biografia d'ina chasa"
Num: Ester Vonplon
Sparta: Art figurativ
Titel: Project d'art "Otavia"
Num: Roman Weishaupt
Sparta: Teater
Titel: Project da teater "E tgei resta?"
Num: Dominik Zehnder
Sparta: Art figurativ
Titel: Project d'art "tracce"
Num: Thomas Zindel
Sparta: Art figurativ
Titel: Project d'art "TEC NEV "
Infurmaziuns:
Armon Fontana, promoziun da la cultura dal Grischun, Loëstrasse 26, 7001 Cuira,
telefon 081 257 48 02, e-mail:
armon.fontana@afk.gr.ch.
Gremi: uffizi da cultura
Funtauna: rg uffizi da cultura