La regenza grischuna ha deliberà il rapport davart la finanziaziun da las baselgias en il chantun Grischun per mauns dal cussegl grond. En quest rapport vegn giuditgà il svilup finanzial a vista mesauna ed a lunga vista per las baselgias chantunalas, vegnan inditgadas las consequenzas pussaivlas e vegn deducida la ristga finanziala per il stadi e per las baselgias sco er vegnan preschentadas las mesiras che resultan da quai e che servan a schliar la problematica a vista pli lunga.

En la sessiun d'october 2013 è vegnida inoltrada l'incumbensa da la fracziun da la PLD concernent la finanziaziun futura da las incumbensas da nossas baselgias chantunalas. En sia resposta è la regenza sa declerada pronta d'elavurar – en collavuraziun cun las baselgias chantunalas – in rapport che mussa pussaivladads per finanziar en il futur las incumbensas da las baselgias chantunalas. En la sessiun da zercladur 2014 è l'incumbensa vegnida acceptada cun 83 cunter 2 vuschs e cun 6 abstenziuns. Questa incumbensa ademplescha la regenza cun deliberar il rapport per mauns dal cussegl grond.

Ademplind l'incumbensa vegnan preschentadas en il rapport l'emprim la situaziun giuridica e la situaziun dals fatgs en il chantun Grischun sco er en auters chantuns. Alura suondan il giudicament da las consequenzas finanzialas a media ed a lunga vista e las consequenzas che resultan da quai cun considerar tschertas ristgas. Plinavant vegnan tematisads la dumonda da las duplicitads e models da finanziaziun futurs pussaivels per il chantun Grischun. La valitaziun e las conclusiuns en il facit servan sco basa per inoltrar ina dumonda. Il rapport è vegnì elavurà en stretga collavuraziun cun las baselgias chantunalas. En quest connex è vegnida realisada – ultra dals contacts bilaterals intensivs – ina clausura cun las persunas responsablas da las duas baselgias chantunalas.

Il basegn da midar il sistem da finanziaziun vertent n'è betg urgent. La taglia da baselgia da las persunas natiralas e la taglia da cultus vegnan purtadas da las commembras e dals commembers da las baselgias e da las interpresas ch'èn obligadas da pajar questas taglias, e quai en moda solidarica ed en renconuschientscha da l'impurtanza da las baselgias chantunalas che funcziunan bain e che han a disposiziun meds finanzials solids. L'effectiv da commembras e da commembers da las baselgias grischunas po vegnir designà sco robust, schebain ch'el mussa ina tendenza regressiva.

La regenza e las baselgias chantunalas èn da l'avis che la finanziaziun vertenta da las baselgias duai cleramain vegnir preferida oz ed er en l'avegnir. Quai per l'ina en colliaziun cun ina cuntinuaziun consequenta da las baselgias chantunalas sin la via per mantegnair lur effectiv da commembras e da commembers, per la quala ellas sa stentan exemplaricamain, sco er per optimar lur structuras, lur organisaziuns e lur situaziun economica. Da l'autra vart ha il stadi in interess considerabel che fermas baselgias chantunalas sco instanzas ch'èn relevantas per la societad cun lur effect stabilisant en dumondas etic-religiusas e socialas restan mantegnidas. Spezialmain en regiuns perifericas èn las baselgias garantas impurtantas per mantegnair – supplementarmain a lur incumbensas centralas – in servetsch public minimal. En tut il chantun e spezialmain er en ils centers surpiglian ellas funcziuns impurtantas sco raits socialas stabilisantas.

Il cussegl grond vegn a tractar questa fatschenta en la sessiun d'october 2015.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail Andrea.Stadler@ekud.gr.ch


Gremi: regenza
Funtauna: rg chanzlia chantunala dal Grischun