Tenor l'incumbensa dal cussegl grond duai la lescha per promover la cultura vegnir revedida totalmain. Tar questa revisiun èn vegnidas resguardadas – ultra da la dumonda da posiziunar da nov la promoziun chantunala da la cultura – er las autras incumbensas parlamentaras e las structuras novas ch'èn resultadas da la refurma dal territori.

La promoziun actuala da la cultura dal chantun Grischun sa basa sin la lescha per promover la cultura dals 28 da settember 1997 e sin l'ordinaziun tar la lescha per promover la cultura dals 12 da schaner 1998. La lescha per promover la cultura sco er l'ordinaziun che sa basa sin tala èn sa cumprovadas fin oz en blers secturs sco basa per la promoziun chantunala da la cultura.

La revisiun totala da la lescha per promover la cultura è vegnida iniziada da l'incumbensa dal deputà Bruno Claus e sutsegnaders che ha pretendì da la regenza da suttametter al cussegl grond ina revisiun totala da la lescha per promover la cultura. En connex cun la revisiun totala da la lescha davart il svilup economic e cun la creaziun d'ina lescha per promover il sport han er stuì vegnir examinadas dumondas davart la reorganisaziun e davart in nov posiziunament da la promoziun chantunala da la cultura. Tscherts puncts centrals pussaivels da la promoziun da la cultura (lavur culturala professiunala e cultura laica), ils puncts da contact cun la promoziun da l'economia sco er las cumpetenzas e l'elecziun da la cumissiun chantunala per promover la cultura han stuì vegnir sclerids.

Da nov èsi previs d'integrar explicitamain il sustegn da la lavur culturala professiunala en las finamiras da la lescha. En l'elavuraziun dal sboz ch'è ussa qua avant maun èn er vegnids resguardads ils resultats da l'incumbensa Caduff concernent ina pausa tar la revisiun totala da la lescha per il svilup economic e l'incumbensa Montalta concernent l'elavuraziun d'in concept chantunal per promover e per finanziar ils museums regiunals ed ils centers da cultura regiunals. Plinavant prevesa il sboz d'obligar las regiuns da metter a disposiziun ina purschida cumplessiva da scolas da chant e da musica.

La regenza dal chantun Grischun dat en consultaziun in sboz concis. La lescha duai entrar en vigur il 1. da schaner 2018.

La consultaziun dura fin ils 15 d'avrigl 2016. Ils documents respectivs pon vegnir consultads en l'internet sut www.gr.ch / Consultaziuns currentas.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch
- Barbara Gabrielli, manadra da l'uffizi da cultura, tel. 081 257 48 01, e-mail: Barbara.Gabrielli@afk.gr.ch


Gremi: regenza
Funtauna: rg chanzlia chantunala dal Grischun