En sia ultima sesida ha la regenza mess en vigur la lescha davart il svilup economic. Plinavant ha ella tematisà ina collavuraziun pli stretga cun la Lumbardia ed ha concedì contribuziuns finanzialas per las Telefericas Grüsch-Danusa SA.

Mess en vigur la lescha davart il svilup economic
La revisiun totala da la lescha per promover il svilup economic en il chantun Grischun vegn messa en vigur per il 1. da schaner 2016. Ultra da quai approvescha la regenza la revisiun totala da l'ordinaziun respectiva. Ultra da la pussaivladad da cumprar, da render accessibel e da commerzialisar bains immobigliars en lieus cun in potenzial per l'economia publica, pon da nov er vegnir promovids projects d'infrastructura ch'èn impurtants per il sistem, uschenavant ch'els sa basan sin strategias regiunalas per sviluppar l'economia locala. Per quest intent stattan a disposiziun ils proxims 8 onns 80 milliuns francs. Infrastructuras impurtantas per il sistem èn projects ch'èn per regla centrals en ina chadaina da creaziun da valur turistica ubain che vulan daventar quai, uschia che differentas interpresas profiteschan e pon generar da lur vart valurisaziun. Sa basond sin la lescha davart il svilup economic èsi per exempel er vinavant pussaivel da promover occurrenzas, stabiliments da sport, interpresas d'alloschament e projects innovativs. Er las contribuziuns a Grischun vacanzas u a favur da la marca graubünden sa basan sin la nova lescha. In punct central è l'innovaziun cun la promoziun da projects per sviluppar novs products, process e servetschs.

La regenza vul collavurar pli stretgamain cun la Lumbardia
La regiun Lumbardia ed il chantun Grischun han elavurà ina decleraziun d'intenziun per la collavuraziun transcunfinala sin ils champs d'acziun economia, traffic e sanadad. Qua tras vegn persequitada la finamira da promover il svilup economic dal territori da cunfin e da prender per mauns sfidas en quels secturs tematics, nua ch'i existan interess cuminaivels. Delegaziuns politicas da la regiun Lumbardia e dal chantun Grischun duain sa scuntrar regularmain per discutar davart il stadi da la collavuraziun currenta e per examinar in eventual basegn d'agir en auters secturs tematics. Plinavant pon las delegaziuns politicas engaschar gruppas da lavur per secturs specifics.
Per suttascriver questa decleraziun d'intenziun envida la regenza grischuna ina delegaziun da la Lumbardia ad in inscunter politic l'onn 2016 a Le Prese.

Contribuziuns per renovar la plazza aviatica regiunala a Samedan
La regenza conceda a l'interpresa d'infrastructura Plazza aviatica regiunala a Samedan in emprest da 2 milliuns francs en il rom da la nova politica regiunala (NPR) per renovar la plazza aviatica. Analogamain a quest emprest federal deliberescha ella ina contribuziun da var 337 000 francs. Sin basa da la lescha per promover il svilup economic en il chantun Grischun vegn ultra da quai garantida ina contribuziun chantunala dad 1,66 milliuns francs.
Ord vista da la regenza augmenta la renovaziun da la plazza aviatica regiunala a Samedan la cumpetitivitad turistica da la regiun da l'Engiadin'ota. La colliaziun cun il traffic aviatic è in avantatg dal lieu unic en la concurrenza internaziunala ch'i vala da mantegnair er ord vista chantunala. Las emprimas lavurs da renovaziun l'onn 2016 èn er impurtantas per realisar ils champiunadis mundials da skis alpin da la FIS 2017 a San Murezzan.

Contribuziuns finanzialas per las Telefericas Grüsch-Danusa SA
Per construir la sutgera Stäfel-Matta vegn concedì a las Telefericas Grüsch-Danusa SA in emprest federal dad 840 000 francs en il rom da la nova politica regiunala da la confederaziun (NPR). Plinavant conceda la regenza ina contribuziun chantunala da 195 025 francs. Las Telefericas Grüsch-Danusa SA planiseschan da construir ina nova sutgera accuplabla da quatter. Uschia duai tranter auter vegnir engrondida la purschida da pistas blauas, ed il territori da skis principal duai vegnir situà pli ad aut.

Contribuziuns chantunalas per las basas tecnicas en las vischnancas da Breil e da Glion
A las vischnancas da Breil e da Glion garantescha la regenza contribuziuns per construir respectivamain per engrondir las basas tecnicas.
Per il project "Basa tecnica Breil" conceda la regenza ina contribuziun da 448 000 francs. La vischnanca da Breil ha l'intenziun da construir ina nova basa tecnica communala per ils secturs manaschi forestal, servetsch tecnic, pumpiers, plazza da recicladi e provediment d'aua. Cun concentrar ils manaschis communals en in lieu pon vegnir nizzegiadas meglier las sinergias.
Per renovar e per engrondir la basa tecnica forestala Rueun conceda la regenza ina contribuziun da 372 000 francs. Tras la fusiun da 13 vischnancas a la vischnanca da Glion per il 1. da schaner 2014 èn er s'unids ils anteriurs manaschis forestals resp. reviers forestals al manaschi forestal Glion. En quest connex èn ils trais lieus da las basas tecnicas forestalas vegnids concentrads sin il lieu a Rueun. Tras l'extensiun dal territori d'activitad na correspunda la basa tecnica Rueun betg pli a las pretensiuns d'ozendi. Cun l'engrondiment vegnan stgaffidas tranter auter ulteriuras localitads da biro, installaziuns sanitaras ed ina nova susta da vehichels.


Gremi: regenza
Funtauna: rg chanzlia chantunala dal Grischun