La stgaudada dal clima actual lascha luar rasantamain l'uschenumnà "glatsch etern" da las Alps. En quest connex vegnan a la glisch er adina puspè objects ch'èn stads cuvrids dal glatsch dals vadretgs decennis, tschientaners u schizunt millennis a la lunga. Quests chats èn savens d'ina impurtanza enorma per la scienza. Pertge che quai è uschia e tge istorgias che er objects absolutamain modests quintan, po vegnir scuvrì en la pitschna exposiziun speziala dal museum retic. Ina impressiun da la da l'exposiziun dat in nov video da la chanzlia chantunala dal Grischun sut www.gr.ch.

Dapi dus onns e mez sa deditgescha il project kAltes Eis – glatsch fraid e vegl a l'archeologia glaziala en il Grischun. Quest project vegn manà tras a l'Institut grischun per la perscrutaziun da la cultura. Pervia da la stgaudada cuntinuanta dal clima na dattan ils glatschers alpins betg mo liber entiras cuntradas,mabain er adina puspè objects da differentas epocas dal passà. Tals chats or dal glatsch èn per l'archeologia d'ina impurtanza speziala, perquai ch'els èn per regla mantegnids fitg bain. Ultra da quai dattan els informaziuns davart ina part uschiglio pauc enconuschenta da la cuntrada cultivada: las regiuns autalpinas.

La pitschna exposiziun speziala dal museum retic marchescha la fin dal project da perscrutaziun e d'intermediaziun e sa deditgescha a l'archeologia glaziala en tut sia ladezza tematica e temporara. Mussads vegnan differents chats or da glatschers dal Grischun e dals territoris vischins, integrads en lur context istoric.


Infurmaziuns:
Andrea Kauer Loens, directura dal museum retic, tel. 081 257 48 40


Gremi: museum retic
Funtauna: rg museum retic