En sia ultima sesida ha la regenza prendì posiziun tar la revisiun dal dretg davart rauba privlusa ed ha approvà l'ultima etappa d'acquist da nov material rullant per la Viafier retica. Plinavant ha ella approvà la revisiun parziala da la lescha da construcziun da Panaduz e la revisiun parziala da la planisaziun locala da Bever.

Posiziun tar la revisiun dal dretg davart rauba privlusa
La regenza grischuna prenda posiziun tar la revisiun dal dretg davart rauba privlusa (ordinaziun davart il transport da rauba privlusa sin via). Per garantir ch'il transport da rauba privlusa saja segir, è quel suttamess a prescripziuns severas. Perquai ch'il dretg svizzer sto vegnir accordà a la convenziun europeica davart il transport internaziunal da martganzia privlusa sin via (ADR), è necessaria questa revisiun. La ADR vegn adattada mintga dus onns en ina dimensiun relativamain vasta.
La regenza beneventa da princip las midadas dal dretg da rauba privlusa che vegnan proponidas da la confederaziun. Betg d'accord n'è ella dentant cun las disposiziuns che prevesan da surdar a las autoritads chantunalas las cumpetenzas per permetter transports cun chars a motor. I na dat nagins motivs per remplazzar la soluziun vertenta cumprovada tras ina repartiziun da las incumbensas tranter la confederaziun ed ils chantuns. La surdada previsa da las cumpetenzas avess ultra da quai consequenzas negativas per la segirezza dal traffic.

Renovaziun da la via da guaud "Grosswald" a Claustra
La regenza ha approvà il project "Via da guaud Grosswald" da la vischnanca da Claustra-Serneus ed ha concedì ina contribuziun chantunala dad 1,04 milliuns francs. Il project prevesa da renovar la via da guaud existenta sin ina lunghezza da 1280 meters e da far londeror ina via che po vegnir duvrada er da camiuns. Areguard la ladezza e la capacitad na basta la via da guaud dals onns 1950 betg pli a las pretensiuns envers ina cultivaziun moderna dal guaud. Uschia chaschuna la racolta da laina gronds custs e n'è betg pli rentabla.
Il "Grosswald" è situà sur Claustra ed ha ina surfatscha da 122 hectaras. El protegia il vitg da Claustra, la via chantunala, vias communalas e la lingia da la Viafier retica cunter lavinas, cunter crudada da crappa, cunter sbuvadas e cunter bovas.

Approvà l'ultima etappa d'acquist da nov material rullant per la Viafier retica
La regenza ha approvà la quarta ed ultima etappa dal concept da flotta da la Viafier retica per la renovaziun dal material rullant. La quarta etappa prevesa l'acquist da 27 trens ad autotracziun accuplabels "Retica 30" che han mintgamai quatter parts. Ils custs d'investiziun importan 320 milliuns francs. 80 pertschient dals custs vegnan surpigliads da la confederaziun e 20 pertschient dal chantun. Correspundentamain resultan per il chantun custs d'amortisaziun annuals da 2,5 milliuns francs en media a partir dal mument ch'il nov material rullant vegn mess en funcziun. Quests custs pon dentant vegnir cumpensads per part tras respargns e tras gudogns d'effizienza.
Tras l'acquist da la tecnologia la pli nova da trens ad autotracziun po vegnir cuntanschida ina vasta standardisaziun da la flotta. Plinavant po la purschida existenta vegnir cumplettada cun in tact da mes'ura consequent sin las lingias per Tavau e per San Murezzan, e la productivitad po vegnir augmentada.