In studi cuminaivel dals chantuns Son Gagl e Grischun mussa ch'i pudess esser avant maun aua chauda en la profunditad da la Val dal Rain da Sargans, da la Val da la Seez, da la Val dal Rain grischuna e dal Partenz davant. Pliras vischnancas pudessan profitar da questa geotermia profunda idrotermala. Ils resultats dal studi las porschan la basa per decider, sch'ellas vulan sustegnair lur provediment d'energia en l'avegnir cun chalur da la geotermia.

Il studi descriva las zonas geotermicas potenzialmain interessantas en ina profunditad da 1000 fin 5000 meters e lur potenzial d'utilisaziun. Damai ch'igl èn avant maun mo paucas datas geologicas, sa basan las deposiziuns davart las temperaturas pussaivlas e davart la quantitad da l'aua chauda disponibla sin modellaziuns e prognosas. Ultra da las resursas geotermicas che stattan a disposiziun mussa il studi a maun da calculaziuns da model precisas per edifizi er il consum d'energia per stgaudar locals e per far aua chauda en l'areal d'abitadi da mintga vischnanca.

Pussaivladads d'utilisaziun per las vischnancas
Il cumenzament da fanadur ha l'uffizi d'energia e da traffic dal chantun Grischun infurmà las vischnancas da la Val dal Rain grischuna davart ils resultats dal studi. Tut tenor lieu pudess ina vischnanca duvrar l'aua chauda per cuvrir ses basegn da chalur ubain per producir en moda cumbinada electricitad e chalur.
En in proxim pass pon las vischnancas – sa basond sin ils resultats dal studi – sclerir cun in studi da realisabladad che sa referescha a lur territori, sch'ellas pon cuvrir per part lur consum d'energia cun la geotermia profunda. En collavuraziun cun ils provediturs d'energia e cun il chantun pon vegnir concretisads ils resultats modellads dal studi e reducidas prognosas malsegiras.

Purschida uschè datiers sco pussaivel dal basegn
L'utilisaziun da la profunditad pudess esser da grond interess en quels territoris, nua che las resursas geotermicas pussaivlas sa chattan datiers da la clientella potenziala. Uschia èn pussaivels projects per la producziun exclusiva da chalur per exempel en la regiun da Walenstadt-Flums, da Sargans sco er da Landquart-Zizers e da Domat. Ils territoris, nua ch'i pudess vegnir tratga en consideraziun termicamain ina producziun cumbinada d'electricitad e da chalur cun prestaziuns da retratga da passa 10 megawatts, èn imaginabels en la regiun da Vilters-Wangs, da Bad Ragaz-Maiavilla e da Cuira sco er eventualmain da Panaduz-Razén.

Project interchantunal
Ils chantuns Son Gagl e Grischun han dà l'onn 2014 a las ovras electricas da la citad da Son Gagl ed a l'agentura d'energia da Son Gagl l'incumbensa d'evaluar l'utilisaziun da la geotermia profunda en la Val dal Rain grischuna, en il Partenz davant, en la Val dal Rain da Sargans ed en la Val da la Seez. Cun ils documents gia avant maun èn vegnidas stimadas las resursas geotermicas ed a medem temp è vegnì eruì il potenzial d'utilisaziun. Ils scleriments han medemamain mussà che pliras vischnancas u regiuns fissan adattadas er per raits da chalur.


Infurmaziuns:
- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch  


Gremi: uffizi d'energia e da traffic
Funtauna: rg uffizi d'energia e da traffic