La regenza grischuna ha deliberà per la consultaziun il sboz per ina revisiun totala da la lescha chantunala dal dretg da burgais. La lescha chantunala dal dretg da burgais duai vegnir adattada al dretg federal revedì, resguardar ils basegns che resultan da la pratica giuridica e survegnir ina meglra sistematica.

Il 1. da schaner 2018 vegn ad entrar en vigur la revisiun totala da la lescha federala davart il dretg da burgais svizzer. Pervia da questa revisiun èsi necessari d'adattar la lescha chantunala dal dretg da burgais, che regla l'acquist e la perdita dal dretg da burgais chantunal e communal. Per ina natiralisaziun pretenda il dretg federal revedì da nov numnadamain ina permissiun da domicil sco er enconuschientschas linguisticas en scrit d'ina lingua naziunala. Uschia prevesa la confederaziun cundiziuns pli severas che quellas che ston vegnir ademplidas oz en il chantun Grischun. Plinavant sto vegnir resguardada en il dretg chantunal l'armonisaziun dals termins da domicil chantunals e communals, ch'è vegnida introducida da la confederaziun. En il chantun Grischun chaschuna quai ina reducziun per part marcanta da la durada minimala da la dimora che valeva fin ussa en la vischnanca da natiralisaziun. Cun la revisiun vegni dentant er profità da l'occasiun da tegnair quint da differents basegns da la pratica giuridica, per exempel duain persunas svizras stuair ademplir premissas da qualificaziun main severas che candidatas estras e candidats esters. La finala duai ina nova sistematica facilitar l'access a la lescha.

La lescha duai entrar en vigur il 1. da schaner 2018. La consultaziun dura fin il 1. da december 2016. Ils documents da consultaziun pon vegnir chargiads giu en l'internet sut www.gr.ch/Consultaziuns currentas u pon vegnir empustads tar il departament da giustia, segirezza e sanadad (tel. 081 257 25 16).


Infurmaziuns:
president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg chanzlia chantunala dal Grischun