Dals 9 da settember 2016 als 22 da schaner 2017 mussa il museum da la natira dal Grischun L'exposiziun speziala "Passentar l'enviern – 31 strategias grondiusas". Ina impressiun da l'exposiziun dat in nov video da la chanzlia chantunala dal Grischun sut www.gr.ch.

En nossas regiuns è l'enviern per la fauna e flora ina gronda sfida. Mintga mais pon il fraid ed il vent far schelar tut, la naiv po impedir il moviment e la tschertga dal savens stgars nutriment, l'aua ch'è schelada na stat betg a disposiziun a las ragischs. Durant l'abundanza da la stad ston las plantas ed ils animals arcunar uschè blera energia sco pussaivel e tractar quella en ina moda fitg spargnusa durant l'enviern. To be or not to be – l'enviern vegni decidì savens tge ch'ha in futur.

Bleras vias mainan a la finamira
Las creatiras han sviluppà diversas adattaziuns per arrivar da l'atun en la proxima primavaira. L'exposiziun speziala "Passentar l'enviern – 31 strategias grondiusas" preschenta 31 vias, co che plantas, animals e bulieus surventschan l'enviern. Qua datti per exempel la lieur alva che n'è betg mo camuflada perfetgamain cun ses pail alv d'enviern, mabain che vegn er stgaudada agreablamain da quel: Empè da pigments arcuneschan ils chavels numnadamain aria che isolescha. Cun sias pattas ladas po ella ultra da quai sigliottar perfetgamain sur la naiv, senza sfundrar. U las muntanellas che passentan l'enviern cun durmir en il ravugl da lur famiglia: Entamez, nua che l'isolaziun è la meglra, dorman ils animals ils pli giuvens, strusch datiers da lur parents. La temperatura da las muntanellas sa sbassa durant il sien d'enviern tuttina fin quasi al punct da schelira. U las grusaidas ch'èn dependentas l'enviern d'ina cuverta da naiv che las isolescha: Tut lur frastgas che sa stendan suror la naiv en l'aria fraida, schelan. L'autezza d'ina grusaida tradescha pia durant la stad la probabla autezza da la naiv durant l'enviern. U il pin che arcunescha antischeladers e po alura supportar temperaturas fin a -40°C senza subir donn. U la flammulina velutipes, in bulieu da lain, dal qual il fritgal crescha il pli gugent a temperaturas da stgars sur nulla grads.

In'exposiziun attractiva per giuven e vegl
L'exposiziun speziala "Passentar l'enviern" è concepida sco cuntrada d'enviern ennavada, en la quala vegnan preschentadas 31 istorgias d'enviern grondiusas – respectivamain èn zuppadas bain sut la grossa cuverta da naiv e spetgan da vegnir scuvridas da las visitadras e dals visitaders. L'exposiziun è vegnida concepida e realisada dal museum da la natira da Lucerna e sa distingua tras sia furma persvadenta e tras numerusas parts interactivas.

Uras d'avertura: mardi fin dumengia da las 10.00 fin las 17.00, glindesdi serrà


Infurmaziuns:
- Ueli Rehsteiner, directur dal museum da la natira dal Grischun, Tel. 081 257 28 43
- Flurin Camenisch, pedagog da museum, Tel. 081 257 28 45


Gremi: museum da la natira
Funtauna: rg museum da la natira