La regenza ha proponì da reponderar l'annullaziun dal sustegn finanzial a favur dal rom da studi "rumantsch" a l'universitad da Turitg. Ultra da quai vegn ella ad examinar consequentamain la necessitad da la legislaziun, ed ella ha prendì posiziun tar trais consultaziuns da la confederaziun.

Cumbat per il sustegn finanzial a favur dal rom da studi "rumantsch" a l'universitad da Turitg
La regenza è vegnida a savair tras las medias che la scola politecnica federala (SPF) vegnia a chalar la fin da l'onn 2018 da pajar sia contribuziun annuala da 100 000 francs a favur da la finanziaziun da la professura da rumantsch a l'universitad da Turitg. La regenza na po betg acceptar la decisiun da la direcziun da la SPF e propona ina reponderaziun.
La decisiun da la direcziun da la SPF indeblescha las stentas dal chantun per promover la lingua naziunala rumantsch en la scolaziun da persunas d'instrucziun dal stgalim superiur da la scola populara sco er da persunas da l'administraziun publica e da las medias.

Examinaziun consequenta da la necessitad da la legislaziun
La regenza ha previs d'examinar la necessitad per garantir la qualitad da la legislaziun. Questa examinaziun duai impedir cunzunt ch'i resultan memia bleras regulaziuns.
En connex cun midadas da lescha essenzialas duai vegnir examinà consequentamain en ina fasa dal project legislativ fitg tempriva , sch'il project è necessari. La regenza giuditgescha, sch'ina nova regulaziun è insumma necessaria e pir suenter vegn in project acceptà en la planisaziun legislativa. Questa examinaziun da la necessitad vala per tut las revisiuns parzialas e totalas da constituziuns, da leschas e d'ordinaziuns dal cussegl grond e duai vegnir applitgada a partir dal 1. d'october 2016.

Posiziun tar l'ordinaziun davart ils agens meds
La regenza ha prendì posiziun tar la midada da l'ordinaziun federala davart ils agens meds e la repartiziun da las ristgas da las bancas. Cun calcular las pretensiuns envers ils agens meds per ristgas da credits da derivats duai vegnir introducida ina nova tariffa da standard e duain vegnir precisadas las reglas d'ina garanzia tras agens meds en cas da participaziuns a fonds. Perquai che la realisaziun da questas novas chaussas vegn ad esser cumbinada per bleras bancas cun lavur e cun custs, prevesa l'ordinaziun ina tariffa simplifitgada per instituts pli pitschens.
La regenza beneventa la differenziaziun da las prescripziuns regulatoricas. Ma tenor ella va la proposta memia pauc lunsch. Las bancas che han activitads da fatschenta survesaivlas e betg cumplexas e ch'appartegnan a la categoria da surveglianza 3 da la FINMA, da las qualas fa part er la banca chantunala grischuna, èn pertutgadas spezialmain ferm. Ellas vegnan confruntadas en curt temp cun novas cundiziuns regulatoricas che han per il pli mo fitg curts termins da realisaziun. I vegnan introducids novs models e novas metodas che daventan adina pli cumplexs. La consequenza è che la lavur da realisaziun crescha ad in crescher ed è sproporziunada cunzunt per las bancas pli pitschnas e mesaunas. Quai chaschuna fitg gronds custs. La regenza spetga perquai che las proceduras simplifitgadas valian en mintga cas er per las bancas mesaunas.

Consultaziun tar l'ordinaziun d'alarm – concessiun integrala
La regenza grischuna ha prendì posiziun tar la midada da l'ordinaziun federala d'alarm. Qua sa tracti da la rait da func da segirezza POLYCOM da las autoritads e da las organisaziuns da salvament e da segirezza da la Svizra. Per la renovaziun parziala dal sistem, che vegn ad avair lieu a partir da l'onn 2018, e per la repartiziun dals custs duai vegnir stgaffida ina basa giuridica pli solida.
L'uffizi federal da communicaziun (UFCOM) pretenda da mintga utilisader da POLYCOM che ha in'atgna persunalitad giuridica, ch'el dumondia in'atgna concessiun. Pervia dal grond dumber da differentas utilisadras e da differents utilisaders è quai fitg cumplitgà e tut en tut cumbinà cun custs considerabels. La regenza è da l'avis ch'ins na possia betg pretender dals chantuns e da las vischnancas d'introducir POLYCOM ed alura d'als far pajar cun conceder ina concessiun. Perquai propona la regenza d'examinar d'introducir ina concessiun integrala che cumpiglia tut las utilisadras e tut ils utilisaders. Quai reduciss tant la lavur dal UFCOM sco er ils custs da las utilisadras e dals utilisaders.

La regenza beneventa la midada da l'ordinaziun davart las bancas da gieu
La regenza ha prendì posiziun tar la midada da l'ordinaziun federala davart las bancas da gieu. A las bancas da gieu che sa chattan en ina regiun da staziunament che dependa economicamain fitg dal turissem stagiunal e ch'èn confruntadas cun problems da rentabilitad, duai da nov vegnir permess da serrar ils gieus a la maisa durant maximalmain 270 dis empè da durant 60 dis per onn.
La regenza sustegna senza resalvas la midada previsa da l'ordinaziun. Ella è da l'avis che questa mesira duess senza auter vegnir tratga a niz en las regiuns turisticas che stattan economicamain sut l'ensaina da las stagiuns.

La punt veglia sur il Rain anteriur Danis-Tavanasa resta
La regenza ha concludì che la punt veglia sur il Rain anteriur (punt da Versell) tranter Danis e Tavanasa vegn excludida per ils 30 da settember 2016 da la rait da vias chantunalas e cedida a la fundaziun NOSSA PUNT sco proprietad e per il mantegniment. Ultra da quai vegn il traject da la via da Breil tranter la punt nova sur il Rain anteriur a Danis e la punt da Versell excludì per il 1. da fanadur 2017 da la rait da vias chantunalas e cedì a la vischnanca da Breil sco proprietad e per il mantegniment. Als custs per sanar la punt da Versell vegn pajada ina contribuziun chantunala pauschala unica da 300 000 francs. Quest import correspunda als custs che fissan resultads, sche la punt fiss vegnida demolida. Plinavant vegn garantì in import da 318 500 francs per mesiras da la tgira da monuments.
Il project da construcziun per la punt nova sur il Rain anteriur preveseva da spazzar la punt veglia, en cas ch'ins n'avess betg chattà ina nova proprietaria. Grazia a l'engaschament da l'uniun "NOSSA PUNT" ed a la constituziun d'ina fundaziun cun il medem num han ins ussa la garanzia per la sanaziun, per la gestiun e per il mantegniment sco er per la cuntinuitad da la punt da Versell.


La regenza ha approvà la revisiun parziala da la planisaziun locala da Silvaplauna
La regenza ha approvà la revisiun parziala da la planisaziun locala da la vischnanca da Silvaplauna, ch'è vegnida concludida ils 28 d'avrigl 2016 e che cuntegna il plan da zonas 1:500 "Hotel Conrad".
Il motiv per questa revisiun parziala è stada la midada d'ina surfatscha da 1079 meters quadrat da la zona dal center dal vitg en la zona per hotels en il center dal vitg. Questa adattaziun è ina contribuziun per ch'il manaschi da l'hotel Conrad restia mantegnì en il futur. Concretamain èsi planisà d'engrondir la purschida dad actualmain 29 letgs a totalmain 60 letgs e da construir supplementarmain in stabiliment da wellness.

© Comet Photoshopping GmbH / Dieter Enz


Gremi: regenza
Funtauna: rg chanzlia chantunala dal Grischun