Per in svilup progressiv dal Grischun dovri impuls substanzials. Il comité internaziunal olimpic ha engrondì la libertad concepziunala e permetta novas furmas da candidaturas. La regenza vul profitar dals gieus olimpics e paralimpics d'enviern 2026 sco motors per sviluppar vinavant il chantun en moda economicamain e socialmain duraivla.

La regenza ha deliberà la missiva tar la candidatura dal Grischun per ils gieus olimpics e paralimpics d'enviern 2026 e preschentà quella in corpore a la publicitad. Il cussegl grond tracta la fatschenta en la sessiun da december 2016.

La regenza è persvadida ch'il Grischun ha – ensemen cun ses partenaris – la cumpetenza ch'i dovra per realisar questa occurrenza gronda e che l'infrastructura necessaria è per gronda part avant maun. Ils gieus olimpics d'enviern han lieu en furma decentrala, uschia ch'i na dovra betg blers edifizis temporars. Profitar pon oravant tut il mastergn, ils manaschis da servetsch ed ils manaschis industrials, il turissem, las valladas dal chantun ed il sectur da furmaziun e da perscrutaziun. A medem temp permetta il project da modernisar e d'engrondir l'infrastructura. La Svizra po sa preschentar sco pajais progressiv ed avert ch'è pront ed abel da realisar gieus olimpics d'enviern adattads e persistents da la generaziun nova.

Finamiras da la regenza
La realisaziun dals gieus olimpics e paralimpics d'enviern 2026 è in project d'impurtanza naziunala. La stretga collavuraziun en connex cun il project sa referescha a la chaussa, è orientada a soluziuns e generescha partenadis prezius entaifer sco er ordaifer il chantun. Ina finamira centrala da la regenza è l'effect persistent per il chantun Grischun e per ses partenaris, e quai en reguard economic, ecologic, tecnologic e social. Eventualas infrastructuras novas e renovaziuns necessarias ston vegnir realisadas tenor las strategias per il svilup da l'economia locala cun l'intent da garantir in'utilisaziun posteriura economicamain supportabla. L'organisaziun e la realisaziun dals gieus olimpics d'enviern 2026 vegnan prendidas per mauns mo, sch'il preventiv operativ è equilibrà.

Ina investiziun en il futur
Per la fasa da candidatura che dura stgars 3 onns fin a la surdada dals gieus olimpics d'enviern il fanadur 2019 è previs in credit d'impegn brut da 25 milliuns francs. Cuntegnidas èn expensas dad 1 milliun francs che la regenza prevesa per agens scleriments per pudair elavurar ina basa cumplessiva, per ch'ella possia prender la decisiun definitiva l'atun 2018. Gist en vista a las cunvegnas contractualas cun ils differents partenaris naziunals ed internaziunals vesa la regenza in basegn da scleriment. Ils ulteriurs 24 milliuns francs duain la confederaziun, Swiss olympic e la regiun che organisescha ils gieus olympics surpigliar per mintgamai in terz. La grevezza che resulta per il chantun importa pia maximalmain 9 milliuns francs, repartids sin ils proxims onns.

Premissas per ina candidatura
Il cussegl federal è da princip avert per ina candidatura per gieus olimpics e paralimpics d'enviern en Svizra. Tenor la regenza è la tenuta da la confederaziun centrala. Sche la confederaziun n'avess betg dad esser pronta da prestar las garanzias necessarias u sch'il comité internaziunal olimpic avess da far pretensiuns che surpassassan ina limita acceptabla, na vegniss la regenza betg ad inoltrar ina candidatura u vegniss ella a retrair ina candidatura gia inoltrada.

Procedura da votaziun en dus pass
La regenza giuditgescha las schanzas en la procedura naziunala da nominaziun sco intactas. Sch'il resultat da la votaziun dal pievel è positiv, po il Grischun sa participar a la procedura d'annunzia cun ina candidatura acceptada dal suveran. Uschia fissan avant maun la legitimaziun politica necessaria ed ils meds finanzials necessaris per in project empermettent. En ina segunda votaziun, l'atun 2018, avessan las votantas ed ils votants dal Grischun la pussaivladad da decider davart il project definitiv e davart sia realisaziun.


Infurmaziuns:
- president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
- cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch  


Gremi: regenza
Funtauna: rg chanzlia chantunala dal Grischun