La regenza ha dà glisch verda per l'ovra d'accumulaziun a pumpa "Lagobianco", ha prendì posiziun tar in project da consultaziun da la confederaziun ed ha prolungà la cunvegna da prestaziun cun il Forum economic dal Grischun.

Approvà ina nova ovra d'accumulaziun a pumpa en il Puschlav
La regenza ha approvà il project "Lagobianco" da la Repower SA. Il project cumpiglia l'engrondiment dals implants electrics en il Puschlav. L'element central dal project è ina nova ovra d'accumulaziun a pumpa tranter il Lago di Poschiavo ed il Lago Bianco cun ina prestaziun installada da 1000 megawatts. Ils stgalims existents dals implants electrics Cavaglia e Robbia sco er Campocologno duain vegnir engrondids e manads vinavant suenter l'engrondiment. Tenor la nova concepziun da l'implant vegn però a crudar davent l'implant electric existent Palü.
La regenza ha approvà gia la primavaira 2014 il project da concessiun sco er las concessiuns dal dretg da las auas, ch'eran vegnidas dadas da las vischnancas da Puschlav, da Brusio e da Puntraschigna. Silsuenter ha la Repower SA elavurà vinavant e suttamess il project a la regenza per l'approvaziun. Quest project vegn ussa approvà da la regenza cun tschertas cundiziuns e pretensiuns. Tenor la dumonda inoltrada planisescha la patruna da construcziun da realisar ils differents stgalims da l'implant electric en etappas. L'emprim duain vegnir engrondids ils stgalims sisum da l'implant electric (Robbia e Cavaglia).
Il project "Lagobianco" ha ina gronda impurtanza concernent la politica e l'economia d'energia, betg sco ultim er en il rom da la strategia d'energia 2050 da la confederaziun. Il project ha però er in aut standard en quai che reguarda ils aspects dal dretg da las auas e dal dretg da l'ambient. Cun la realisaziun da la nova concepziun da l'implant electric pon vegnir eliminads differents deficits ecologics dals implants actuals e liquidadas sanaziuns da la protecziun da las auas e dal dretg da pestga ch'èn pendentas.


Visualisaziun dal Lago Bianco suenter l'auzament dal mir d'accumulaziun
© Repower SA

Approvà projects da forza idraulica a Bravuogn, Tinizong e Zernez
La regenza ha approvà trais ulteriurs projects da forza idraulica. In da quels è il project "Implant electric Aua da Tisch" da las ovras electricas Alvra-Landwasser SA (OEAL SA). Las OEAL SA planiseschan la construcziun d'in implant electric pitschen en il conduct d'affluenza da la tschiffada existenta da l'aua da Tisch al lai da gulivaziun Islas. I vegn construida ina centrala cun ina turbina a flussiun traversala (220 kilowatts) che duai producir circa 550 000 uras da kilowatt electricitad per onn.
In ulteriur project vegn realisà a Tinizong. L'ovra electrica da la citad da Turitg (ewz) construescha in'uschenumnada ovra electrica d'aua da dotaziun al mir da serra da Murmarera per restituir aua restanta. Tut tenor la varianta da la turbina da dotaziun integrada duain vegnir producidas 1,3 u 2,9 milliuns uras da kilowatt per onn.
A Zernez ha la regenza approvà il project "Implant electric pitschen Sarsura". La vischnanca vul tschiffar l'aua sin l'Alp Sarsura e la turbinar a Crastatscha Suot. L'implant electric d'aua currenta a pressiun auta custa radund 8 milliuns francs e furnescha circa 7 uras da gigawatt electricitad per onn.

La regenza beneventa il plan naziunal d'acziun per duvrar en moda persistenta meds per proteger las plantas
La regenza ha prendì posiziun tar il plan naziunal d'acziun per reducir las ristgas e per duvrar en moda persistenta meds per proteger las plantas. Cun la realisaziun dal plan d'acziun duain vegnir smesadas las ristgas actualas da meds per proteger las plantas (restanzas sin victualias ed en l'aua da baiver). La regenza grischuna constatescha che l'aua da baiver è la victualia la pli impurtanta che sto vegnir protegida sut tut las circumstanzas da substanzas estras nuschaivlas. Er il terren ed ils flums e lais ston vegnir suttamess ad ina protecziun persistenta. La regenza avertescha però d'activissem nunmotivà che chaschuna ulteriurs custs per la confederaziun, per ils chantuns, per las producentas ed ils producents indigens sco er per las consumentas ed ils consuments.
Il nivel dals pretschs è gia aut avunda. Perquai stoi cunzunt vegnir guardà che la producziun da victualias vegnia mantegnida en Svizra e possia daventar cumpetitiva. Ultra da quai ston il grad d'autoprovediment e la segirezza da victualias vegnir tegnids sin in aut nivel. Per in ulteriur scumond da meds per proteger las plantas n'è il temp anc betg madir. Tant pli plaschaivel èsi ch'il chantun Grischun dispona da 59 pertschient manaschis biologics e ch'il Grischun è pia fitg avanzà. Tuttina punctuescha la regenza che las producentas ed ils producents sco er las consumentas ed ils consuments ston cuntinuar a midar lur pensar.

Nova cunvegna da prestaziun cun il Forum economic dal Grischun
Per ils onns 2017 fin 2019 ha la regenza approvà ina nova cunvegna da prestaziun cun il Forum economic dal Grischun. Sa basond sin la lescha davart il svilup economic vegn garantida al Forum economic dal Grischun per questa perioda ina contribuziun chantunala da totalmain 360 000 francs, pia da 120 000 francs per onn. Il Forum economic dal Grischun sa chapescha sco lavuratori da reflexiun grischun. Il forum sco tal emprova da distinguer e da descriver sfidas en il Grischun sco er d'identifitgar eventualas reacziuns da la politica per il svilup da l'economia locala dal Grischun. Per l'onn 2017 vegn per exempel examinada detagliadamain la realisabladad d'in plan d'access economic naziunal per il territori da muntogna ch'è inspirà dal "plan da Marshall".

Nova purschida turistica a Medel, nova plazza da parcar a Zuoz
La regenza ha approvà la revisiun parziala da las planisaziuns localas da las vischnancas da Medel/Lucmagn e da Zuoz. A Medel vegn midada l'utilisaziun da l'anteriura chasa da persunas attempadas e da tgira "Tgasa Sontgaclau". Sin la parcella correspundenta vegn realisà in center da cumpetenza regiunal per in turissem che s'accorda cun la natira e cun la cultura cun hotel. I dovra perquai ina midada da la zona.
En la vischnanca da Zuoz datti gist pliras midadas en il center dal vitg. Il motiv per quai è la construcziun da la nova plazza da parcar sutterrana "Mareg". Per pudair construir il sutpassadi planisà per las pedunas ed ils peduns da la chasa da parcar fin al center dal vitg ston dentant anc vegnir fatgas las adattaziuns da la planisaziun d'utilisaziun.

Zuoz	Medel

© Comet Photoshopping ScRL/ Dieter Enz

Il cussegl da scola auta ha ina nova presidenta
La regenza prenda enconuschientscha da la demissiun da Ludwig Locher sco president e commember dal cussegl da scola da la scola auta da tecnica ed economia (SATE Cuira). Per il rest da la durada d'uffizi dal 1. da schaner 2017 fin ils 30 da zercladur 2018 vegn Brigitta Gadient, actualmain commembra en uffizi dal cussegl da scola da la SATE, elegida sco nova presidenta. Il post ch'è vegnì liber en il cussegl da scola auta surpiglia Jürgen Spindler, manader dal sectur d'interpresa da la Ems-Griltech. Er el vegn elegì per il rest da la durada d'uffizi.


Gremi: regenza
Funtauna: rg chanzlia chantunala dal Grischun