Dapi il matg 2014 è en vigur la lescha federala davart la planisaziun dal territori revedida (LPT). Quella oblighescha ils chantuns d'adattar lur plans directivs a las novas pretensiuns legalas entaifer 5 onns dapi l'entrada en vigur da la revisiun. Cun il sboz dal plan directiv qua avant maun en il sectur da l'abitadi ademplescha il chantun Grischun questa incumbensa.

Fin a l'approvaziun dal plan directiv tras il cussegl federal ston tut las novas enzonaziuns vegnir cumpensadas cun exzonaziuns da la medema grondezza. Suenter l'approvaziun ston vegnir cumpensadas mo pli zonas d'abitar, maschadadas e dal center (ZAMC).

Il plan directiv fixescha il rom per las planisaziuns localas e regiunalas
La realisaziun dal nov dretg da la planisaziun dal territori è ina gronda sfida per ils chantuns, per las regiuns e per las vischnancas. Per il chantun Grischun è la sfida spezialmain gronda, perquai ch'el ha blers spazis cun caracteristicas e cun dinamicas fitg differentas. Las ZAMC da tut il Grischun èn memia grondas e las reservas na sa chattan betg là, nua ch'ellas fissan giavischadas pervia da la prognosa demografica.

Questa situaziun da partenza pretenda che las ZAMC vegnian per part transferidas davent dals territoris cun in svilup demografic negativ en territoris ed en lieus pli dinamics. Quai vegn fatg uschia che las vischnancas adattan lur ZAMC al basegn effectiv. Per quest intent ha l'uffizi per il svilup dal territori (UST) registrà la capacitad communala da la zona da construcziun tenor ina metodica unitara sin in fegl da datas da las vischnancas e preschentà ella en moda cartografica.

Ultra da quai ha il UST elavurà la basa che duai infurmar tranter auter tge ZAMC che vegn en dumonda per ina midada da zona u per ina dezonaziun e nua ch'i sa chattan da l'autra vart ZAMC che fissan adattadas pervia da lur situaziun e pervia da lur avertura da vegnir concentradas u engrondidas. Il territori d'abitadi actual dal chantun è vegnì fixà cartograficamain en il plan directiv sco resultat intermediar.

Incumbensas a las regiuns ed a las vischnancas
Las 11 regiuns elavuran – entaifer 2 onns – in concept regiunal dal territori tenor il nov plan directiv e realiseschan quel en lur plans directivs entaifer 5 onns, e quai ensemen cun la determinaziun da lur territori d'abitadi. Ultra da quai vegnan las regiuns incumbensadas d'introducir la gestiun dals lieus da lavur.

Las vischnancas survegnan l'incumbensa d'elavurar in model directiv territorial communal entaifer 2 onns dapi il relasch dal plan directiv e d'examinar, quant fitg che lur zonas da construcziun èn duvradas. Entaifer 5 onns han ellas da reveder lur planisaziun locala en il sectur da l'abitadi. En quest connex sto la ZAMC vegnir adattada al basegn effectiv da 15 onns. Ultra da quai ston las vischnancas prender mesiras cunter l'accumulaziun da terren da construcziun sco er a favur d'ina concentraziun interna. En las vischnancas che han ZAMC surdimensiunadas ston vegnir designadas surfatschas che pon vegnir dezonadas potenzialmain. Quellas ston vegnir segiradas cun zonas da planisaziun e ston vegnir dezonadas u transferidas en autras zonas, suenter che la controlla da la capacitad è vegnida fatga. Sche ZAMC vegnan eventualmain enzonadas da nov, ston las vischnancas observar spessezzas minimalas sco er pretensiuns minimalas per l'avertura cun il traffic public, graduadas tenor il tip da territori.

La finamira da questas incumbensas a las regiuns ed a las vischnancas è quella da cuntanscher in'utilisaziun meglierada da las zonas da construcziun grischunas en direcziun da 100 pertschient.

Controlla tras ina "gruppa fastizadra"
Il mars 2016 è il sboz dal plan directiv vegnì suttamess ad ina uschenumnada "gruppa fastizadra" per ina consultaziun preliminara. Da quella faschevan part en moda represchentativa presidentas e presidents communals e parlamentarias e parlamentaris da las differentas regiuns. Sin basa da las respostas è il sboz vegnì surlavurà.

L'ulteriur urari
Il sboz dal plan directiv è exponì publicamain fin ils 16 da schaner 2017. Fin a quest termin po mintgin inoltrar ina posiziun. Sin basa da las respostas e da l'examinaziun preliminara tras la confederaziun vegn il sboz alura surlavurà. La finamira è quella da preschentar a la regenza l'adattaziun dal plan directiv il 2. u 3. quartal dal 2017 per la decisiun ed alura d'al suttametter a la confederaziun per l'approvaziun.


Infurmaziuns:
Richard Atzmüller, manader da l'uffizi per il svilup dal territori, tel. 081 257 23 21, e-mail Richard.Atzmueller@are.gr.ch


Gremi: uffizi per il svilup dal territori
Funtauna: uffizi per il svilup dal territori